புதிய அரசாங்கத்தை உருவாக்க தனக்கு ஆதரவளிப்பதாகக் கூறும் 121 எம்.பி.க்களின் பட்டியல் தொடர்பாக எதிர்க்கட்சித் தலைவர் டத்தோஶ்ரீ அன்வார் இப்ராஹிம் அளித்த அறிக்கையை பதிவு செய்வதற்கான தேதியை போலீசார் இறுதி செய்யவில்லை என்று புக்கிட் அமான் (மத்திய காவல்துறை) குற்றவியல் விசாரணை துறை இயக்குநர் டத்தோ ஹுசிர் முகமது கூறினார்.
அன்வாரை அழைக்க, துறைக்கு உறுதிப்படுத்தப்பட்ட புதிய தேதி இல்லை என்றார் அவர்.
முன்னதாக, ஓர் அறிக்கையை பதிவு செய்யும் நோக்கத்திற்காக அன்வார் இன்று பிற்பகல் 3 மணிக்கு புக்கிட் அமானுக்கு (பெடரல் போலீஸ் தலைமையகம்) அழைக்கப்படுவார் என்ற வாட்ஸ்அப் விண்ணப்பத்தில் ஒரு செய்தி வைரலாகியது.
இதற்கு முன்னர், புக்கிட் அமானில் பி.கே.ஆர் (மக்கள் நீதிக் கட்சி) தலைவருடனான நேர்காணல் அக்டோபர் 13 ஆம் தேதி திட்டமிடப்பட்டிருந்ததாக அறியப்படுகிறது. ஆனால், பின்னர் அறிவிக்கப்படும் தேதிக்கு ஒத்திவைக்கப்பட்டதாகவும் தெரிகிறது.
இஸ்தானா நெகாராவில் யாங் டி-பெர்த்துவான் அகோங் அல்-சுல்தான் அப்துல்லா ரியாதுடீன் அல்-முஸ்தபா பில்லா ஷாவுடன் அன்வார் இப்ராஹிம் சந்திப்பை ஏற்படுத்துவார் என்றும் கூறப்பட்டது. மலேசியாவின் 9 ஆவது பிரதமர் தொடர்பான சந்திப்பாக இது இருக்கும் என்றும் நம்பப்படுகிறது.
செப்டம்பர் 23 ஆம் நாள் ஒரு பத்திரிகையாளர் சந்திப்பில் அவர் இதை அறிவித்திருந்தார், இதைத் தொடர்ந்து நாடாளுமன்ற உறுப்பினர்கள் அவருக்கு எதிராக போலீஸ் அறிக்கைகளை வெளியிட்டிருதனர்.
