நாட்டின் ஐந்து மாநிலங்கள் வெள்ளத்தால் மிக மோசமாக பாதிக்கப்பட்டுள்ளன. வெள்ளம் காரணமாக தமது குடியிருப்புக்களிலிருந்து வெளியேற்றப்பட்டவர்களின் மொத்த எண்ணிக்கை நேற்று மாலை 66,718 பேராக இருந்தது. இந்த எண்ணிக்கை இன்று காலை நிலவரப்படி 71,208 பேராக அதிகரித்துள்ளது.
வெள்ளம் மோசமாக பாதிக்கப்பட்ட மாநிலங்களாக தொடர்ந்தும் திரெங்கானு மற்றும் கிளாந்தான் ஆகியவை உள்ளன.
கிளாந்தானில் நேற்று மாலை 26,630 பேராக இருந்த வெள்ளத்தால் பாதிக்கப்பட்டோர் எண்ணிக்கை, நேற்றிரவு 31,311 ஆக அதிகரித்துள்ளது என்று, கிளந்தான் மாநில பேரிடர் மேலாண்மைக் குழு (JPBN) செயலகம் தெரிவித்துள்ளது. அங்கு கோத்தா பாரு, பாசீர் மாஸ், பச்சோக், தானா மேரா, பாசீர் பூத்தே, கோலக்கிராய், மாட்டான் மற்றும் ஜெலி ஆகிய மாவட்டங்களில் 139 நிவாரண மையங்கள் செயல்படுகின்றன.
திரெங்கனுவில், நேற்று வெள்ளத்தால் பாதிக்கப்பட்ட 10,735 குடும்பங்களைச் சேர்ந்த 39,108 பேருடன் ஒப்பிடும்போது, இன்று 10,937 குடும்பங்களைச் சேர்ந்த 39,311 பேராக சற்று அதிகரித்துள்ளது. மாநிலத்தில் உள்ள எட்டு மாவட்டங்களிலும் மொத்தம் 304 நிவாரண மையங்கள் செயல்பட்டு வருகின்றன.
பகாங்கில் நேற்று வெள்ளத்தால் பாதிக்கப்பட்டவர்களின் எண்ணிக்கை 214 குடும்பங்களைச் சேர்ந்த 873 பேருடன் ஒப்பிடும்போது, இன்று 113 குடும்பங்களைச் சேர்ந்த 484 பேராக குறைந்துள்ளது. இவர்கள் அனைவரும் அங்குள்ள ஐந்து நிவாரண மையங்களில் தங்கியுள்ளனர்.
ஜோகூரில், வெள்ளத்தால் பாதிக்கப்பட்டவர்களின் எண்ணிக்கை 53 இலிருந்து 48 ஆகக் குறைந்துள்ளது, அத்தோடு சிகாமாட்டில் உள்ள ஒரு நிவாரண மையம் நேற்று மாலை 6 மணிக்கு மூடப்பட்டது.
பேராக்கில், நேற்றிரவு 17 குடும்பங்களைச் சேர்ந்த 54 பேர் பாகன் டத்தோ மற்றும் ஹிலிர் பேராக் மாவட்டங்களிலுள்ள இரண்டு நிவாரண மையங்களில் தங்கியுள்ளனர் என்று, அம்மாநில பேரிடர் மேலாண்மை செயலக செய்தித் தொடர்பாளர் தெரிவித்தார்.
