ஆட்கடத்தல் கும்பலிடமிருந்து குழந்தைகள் உட்பட 73 பேர் மீட்பு

கோலாலம்பூர்:

ஜூன் 12 அன்று Ops Mega Pintas என்ற சிறப்பு நடவடிக்கையில் நாடு தழுவிய அளவில் மேற்கொள்ளப்பட்ட பெரிய அளவிலான நடவடிக்கையில், மனித கடத்தல் கும்பலிடமிருந்து மீட்கப்பட்ட 73 பேரில் 22 குழந்தைகள் மற்றும் 3 மாற்றுத்திறனாளிகள் அடங்குவர்.

புக்கிட் அமான் சிஐடியின் ஆள்கடத்தல் தடுப்பு மற்றும் புலம்பெயர்ந்தோரின் கடத்தல் தடுப்பு பிரிவு (D3) ஆகியவற்றுடன் ஒரே நேரத்தில் நடத்தப்பட்ட இந்த நடவடிக்கையில், 113 மனித கடத்தல்காரர்கள் என்று சந்தேகிக்கப்படுபவர்களும் கைது செய்யப்பட்டதாக புக்கிட் அமான் சிஐடி துணை இயக்குநர் ஃபாடில் மார்சஸ் தெரிவித்தார்.

மீட்கப்பட்டோரில் 25 பேர் ஆண்கள், 26 பேர் பெண்கள், 22 பேர் குழந்தைகள் என்று அவர் கூறினார்.

“பாதிக்கப்பட்டோரில் மலேசியர்கள் மட்டுமன்றி பிலிப்பைன்ஸ், இந்தோனேசியா, பங்ளாதேஷ், கம்போடியா, மியன்மார், தாய்லாந்து ஆகிய நாடுகளைச் சேர்ந்தோரும் அடங்குவர்,” என்று அரச மலேசியக் காவற்படைத் தலைமையகத்தில் ஜூன் 20ஆம் தேதி செய்தியாளர்களிடம் அவர் கூறினார்.

மீட்கப்பட்டோரில் உடற்குறையுள்ள மலேசிய மாது ஒருவர் பாலியல் தொழிலில் கட்டாயப்படுத்தப்பட்டதாகவும் பங்ளாதேஷ் நாட்டவர்களான உடற்குறையுள்ள ஆடவர் இருவர் பிச்சை எடுக்கக் கட்டாயப்படுத்தப்பட்டதாகவும் திரு ஃபடில் மார்சஸ் சொன்னார்.

இல்லப் பணியாளர்கள், ஹோட்டல் ஊழியர்கள், உணவகம், முடிதிருத்தும் கடை போன்றவற்றிலும் பொற்கொல்லர்களிடம் வேலைசெய்தோர் எனப் பலர் மீட்கப்பட்டதாக அவர் குறிப்பிட்டார்.

அமலாக்க நடவடிக்கையின்போது, ஆட்கடத்தலில் ஈடுபட்டதாகச் சந்தேகிக்கப்படும் 113 பேரைத் தடுத்து வைத்துள்ளதாகத் ஃபாடில் தெரிவித்தார். அவர்களில் மலேசியர்களும் பங்ளாதேஷ், இந்தோனீசியா, சீனா, தாய்லாந்து நாட்டவர்களும் அடங்குவர் என்றார் அவர்.

அமலாக்க நடவடிக்கையில், அரச மலேசியக் காவல்துறையின் குற்றவியல் புலன் விசாரணைப் பிரிவு அதிகாரிகளுடன் காவல்துறையின் இதர பிரிவுகளையும் குடிநுழைவுத் துறை உட்பட மற்ற அமலாக்க அமைப்புகளையும் சேர்ந்த அதிகாரிகள் ஈடுபட்டனர்.

ஆட்கடத்தல் நடவடிக்கைகளைக் கடுமையாகக் கருதுவதாகக் கூறிய ஃபடில், இத்தகைய சட்டவிரோத நடவடிக்கைகளில் ஈடுபடும் தனிநபர்களுக்கும் கும்பல்களுக்கும் எதிராகக் கடுமையான நடவடிக்கை எடுக்கப்படும் என்றார்.

ஆட்கடத்தல் தொடர்பான தகவல்கள் ஏதுமிருந்தால் அருகிலுள்ள காவல் நிலையத்தைத் தொடர்புகொள்ளும்படி பொதுமக்களை அவர் கேட்டுக்கொண்டார்.

LEAVE A REPLY

Please enter your comment!
Please enter your name here