மும்பை: மகாராஷ்டிர மாநிலம் மும்பையின் உயிர் நாடியாகக் கருதப்படும் புறநகர் ரயில் சேவையானது, நெரிசல் மிகுந்த நேரங்களில் ஆபத்தானதாக முடிகிறது. குறிப்பிட்ட நேரத்திற்குள் ரயிலைப் பிடித்து வேலைக்குச் செல்ல பயணிகள் அவசர அவசரமாகப் புறப்படுவதால் ரயில்களில் இருந்து விழுந்து அல்லது தண்டவாளத்தில் ஏற்படும் பிற விபத்துகளால் அவர்கள் பலியாவது வாடிக்கையாகி வருகிறது.
பயணிகளின் இறப்பு எண்ணிக்கை நாளுக்கு நாள் அதிகரித்து வருவதால், இப்பிரச்சினையை மிக தீவிரமான பிரச்சினையாகக் கருதி கடுமையான உத்தரவுகளைப் பிறப்பிக்க வேண்டும் எனக்கோரி, யத்தின் யாதவ் என்பவர் மும்பை உயர் நீதிமன்றத்தில் பொதுநல மனு தாக்கல் செய்தார்.
அப்போது நீதிபதிகள் பிறப்பித்த உத்தரவில், “மும்பையின் நிலைமையைப் பார்க்கும்போது மிகவும் பரிதாபமாக உள்ளது. இவ்விஷயத்தில் மத்திய மற்றும் மேற்கு ரயில்வேயின் உயர் அதிகாரிகள்தான் பொறுப்பேற்க வேண்டும். பயணிகள் கூட்டம் அதிகமாக இருப்பதால், எதையும் செய்ய முடியாது என்று கூறக்கூடாது.
ஆடு, மாடுகளைப் போல பயணிகளை ஏற்றிச் செல்கிறீர்கள். இவ்வாறு பயணிகள் பயணிக்க நிர்பந்திக்கப்படுவது மிகவும் வெட்கக்கேடானது. எனவே மேற்கு மற்றும் மத்திய ரயில்வேயின் பொது மேலாளர்கள், இவ்விவகாரம் தொடர்பாக முழு விசாரணை நடத்தி பிரமாணப் பத்திரம் தாக்கல் செய்ய வேண்டும் என்று உத்தரவிட்ட நீதிபதிகள், எட்டு வாரங்களுக்கு வழக்கை ஒத்தி வைத்தனர்.
மேலும், அதிக எண்ணிக்கையிலான மக்கள் கூட்டம், தண்டவாளங்களில் அத்துமீறி நுழைவது மற்றும் ரயில் பாதைகளில் உள்ள ஆக்கிரமிப்புகள் ஆகியவை அதிக இறப்பு எண்ணிக்கைக்கு முக்கிய காரணங்களாக உள்ளன. மற்ற காரணங்களாக, மழைக்காலங்களில் நீர் தேங்குவது, தண்டவாளங்களில் குப்பைத் தீப்பிடிப்பது, தண்டவாள மேடைகள், ரயில் படிக்கட்டுகளுக்கு இடையே உள்ள இடைவெளிகள் ஆகியவை என பிரமாணப் பத்திரத்தில் தெரிவிக்கப்பட்டுள்ளன.
