(ரெ.மாலினி)
மலாக்கா:
இங்குள்ள டுரியான் துங்கல் அணையின் நீர்த்தேக்கப் பகுதியில், இன்று மதியம் சுமார் 1 மணியளவில், டிரம் தொட்டி ஒன்றுக்குள் மனித எலும்புக்கூடு கண்டெடுக்கப்பட்ட சம்பவம் பெரும் பரபரப்பை ஏற்படுத்தியுள்ளது.
கண்டெடுக்கப்பட்ட எலும்புக்கூடு கொலைச் சம்பவத்தில் உயிரிழந்திருக்கக்கூடிய ஒருவருடையதாக இருக்கலாம் என சந்தேகிக்கப்படுகிறது. இருப்பினும், இதுவரை அந்த நபரின் அடையாளம் அல்லது மரணத்திற்கான காரணம் அதிகாரப்பூர்வமாக உறுதி செய்யப்படவில்லை.
சம்பவம் தொடர்பான தகவல் கிடைத்ததும், அலோர் காஜா மாவட்ட காவல்துறைத் தலைவர் சூப்பிரிண்டென்டன் அஹமட் அபு பக்கர் சம்பவ இடத்திற்கு நேரில் சென்று நிலைமையை பார்வையிட்டார்.
காவல்துறையினர் சம்பவ இடத்தை பாதுகாப்புப் பகுதியாக மாற்றி, கண்டெடுக்கப்பட்ட எலும்புக்கூடு மற்றும் டிரம் தொட்டி தொடர்பான தடயங்களை சேகரித்து வருகின்றனர். மேலும், தடயவியல் நிபுணர்களின் பரிசோதனைக்குப் பின்னரே இறந்தவரின் அடையாளம், மரணத்திற்கான காரணம் மற்றும் இது உண்மையில் கொலைச் சம்பவமா என்பது குறித்து தெளிவான தகவல் கிடைக்கும்.
இந்தச் சம்பவம் தொடர்பாக காவல்துறையினர் தொடர்ந்து விசாரணை மேற்கொண்டு வருகின்றனர். மேலதிக தகவல்கள் காவல்துறையின் விசாரணை முடிவுகளுக்குப் பின்னர் வெளியாகும் என எதிர்பார்க்கப்படுகிறது
