இந்நிலையில், வேடந்தாங்கல் மற்றும் சுற்றுப்புறத்தில் போதிய மழையில்லாததால் சரணாலய ஏரிக்கு நீர்வரத்து இல்லாமல் வறண்டு காணப்பட்டதால், பறவைகள் வரத்தும் குறைந்தது. புரெவி புயல் காரணமாக வேடந்தாங்கல், வெள்ளப்புத்தூர் உள்ளிட்ட நீர்பிடிப்புப் பகுதிகளில் கனமழை பெய்ததால் 16 அடி கொள்ளளவு கொண்ட ஏரி, இரண்டே நாட்களில் முழு கொள்ளளவையும் எட்டியது. ஏரியில் நீர் நிரம்பியுள்ளதால் இடம்பெயர்ந்து வரும் பறவைகள் மீண்டும் சரணாலயத்துக்கு திரும்பிவருகின்றன.
அவை, மரக்கிளைகளில் கூடுகட்ட தொடங்கியுள்ளதால் பறவைகள் சீசன் தொடங்கியுள்ளதாக உள்ளூர் மக்கள் மகிழ்ச்சி தெரிவித்துள்ளனர்.
இதுகுறித்து, வேடந்தாங்கல் சரணாலய வனத்துறை அதிகாரிகள் கூறும்போது, “சரணாலய ஏரி 16 அடி முழு கொள்ளளவை எட்டி உபரிநீர் வெளியேறி வருகிறது. பறவைகளும் அதிக அளவில் சரணாலயத்துக்கு வரத் தொடங்கியுள்ளன.
தற்போது, காலை நேரங்களில் 10 ஆயிரம், மாலையில் 14 ஆயிரம் வரை பறவைகளைக் காண முடிகிறது. கொரோனா அச்சம் உள்ளதால், அரசு அறிவிப்பு வெளியிட்டால் மட்டுமே சுற்றுலா பயணிகளின் பார்வைக்கு சரணாலயம் திறக்கப்படும் என்றனர்.
