இந்தநிலையில் மாநில அரசு தீவிர ஆலோசனைக்கு பிறகு நேற்று முதல் பொது மக்களை குறிப்பிட்ட நேரங்களில் மட்டும் மின்சார ரயில்களில் பயணம் செய்ய அனுமதி வழங்கியது. இதன்படி பொதுமக்கள் காலை 7 மணி முதல் மதியம் 12 வரையிலும், மாலை 4 மணி முதல் இரவு 9 மணி வரையிலும் தவிர்த்து மற்ற நேரங்களில் பயணம் செய்ய முடியும்.
இந்த நிலையில் சுமார் 10 மாதங்களுக்குப் பிறகு நேற்று பொதுமக்கள் ஆர்வமாக மின்சார ரயில்களில் பயணம் செய்தனர். காலை 7 மணி வரை மட்டுமே பயணம் செய்ய முடியும் என்பதால், அதிகாலையிலே பல ரயில் நிலையங்களில் பயணிகள் கூட்டம் அதிகமாக காணப்பட்டது. இதேபோல மதியம் 12 மணிக்கு பிறகு ரயில் நிலையங்களில் கூட்டம் அலை மோதியது. டிக்கெட் கவுண்டர்களில் மக்கள் நீண்ட வரிசையில் காத்து நின்று டிக்கெட்டுகளை வாங்கி சென்றனர்.
இதேபோல பிளாட்பாரம், ரயில் நிலைய பகுதிகளிலும் நீண்ட இடைவெளிக்கு பிறகு மக்கள் கூட்டத்தை காண முடிந்தது. மேலும் மின்சார ரயில்களும் பயணிகள் கூட்டத்தில் நிரம்பி வழிந்தன.
முன்னதாக முக்கிய ரயில் நிலையங்களில் பயணிகள் கூட்ட நெரிசல் ஏற்படுவதை தடுக்க கூடுதல் பாதுகாப்பு போடப்பட்டு இருந்தது. சில இடங்களில் உள்ளூர் போலீசாரும் பாதுகாப்பு பணியில் ஈடுபட்டனர். இதேபோல ரயில் நிலையங்களில் கூட்ட நெரிசலை தவிர்க்க அனைத்து பாதைகளும் திறந்து வைக்கப்பட்டன. மேலும் லிப்டு, நகரும் படிக்கட்டுகளும் செயல்பாட்டில் வைக்கப்பட்டு இருந்தன.
முகக்வசம் அணியாதவர்களுக்கு ரயில் நிலையங்களுக்குள் அனுமதி மறுக்கப்பட்டது. இதேபோல ரயில் நிலையங்களிலும் சமூக இடைவெளி உள்ளிட்ட கொரோனா தடுப்பு நெறிமுறைகளை பின்பற்ற பயணிகள் அறிவுறுத்தப்பட்டனர்.
மேலும் முகவசம் அணியாமல் கொரோனா தடுப்பு நெறிமுறைகளை மீறியவர்களுக்கு அபராதம் விதிக்கப்பட்டது. இதேபோல குறிப்பிட்ட நேரத்தில் மட்டும் பொதுமக்கள் மின்சார ரயில்களில் பயணம் செய்வதை உறுதி செய்ய தீவிர டிக்கெட் பரிசோதனை செய்யப்பட்டது.
ஊரடங்கிற்கு முன் மும்பையில் 3 ஆயிரத்து 141 மின்சார ரயில் சேவைகள் இயக்கப்பட்டன. தற்போது 2 ஆயிரத்து 985 சேவைகள் இயக்கப்படுகின்றன.
இந்தநிலையில் 10 மாதங்களுக்கு பிறகு மின்சார ரயிலில் பயணம் செய்தது குறித்து மித்திலேஷ் என்ற பயணி கூறும்போது, “நீண்ட காலத்துக்கு பிறகு மின்சார ரயிலில் பயணம் செய்வது மகிழ்ச்சியாக உள்ளது. இப்போது தான் மும்பையே செயல்பட தொடங்கி உள்ளது போல இருக்கிறது.” என்றார்.
இதேபோல எல்லா நேரங்களிலும் பொதுமக்களை மின்சார ரயில்களில் செல்ல அனுமதிக்க வேண்டும் என மத்திய ரயில்வேயிடம் கோரிக்கை அளித்துள்ளனர். மேலும் மின்சார ரயில் பயணிகளும் அதே கோரிக்கையை நேற்று வலியுறுத்தி உள்ளனர்.
