ஈரானுக்கும் அமெரிக்கா உள்ளிட்ட வல்லரசு நாடுகளுக்கும் இடையே கடந்த 2015-ஆம் ஆண்டு அணுசக்தி ஒப்பந்தம் மேற்கொள்ளப்பட்டது.

அமெரிக்க அதிபராக டிரம்ப் பதவியேற்ற பிறகு அந்த ஒப்பந்தத்திலிருந்து விலகுவதாக கடந்த 2018- ஆம் ஆண்டு அறிவித்தாா். மேலும், ஒப்பந்தம் காரணமாக விலக்கப்பட்டிருந்த ஈரான் மீதான பொருளாதாரத் தடைகளை மீண்டும் அமல்படுத்தினாா். இந்த விவகாரத்தில் இரு நாடுகளுக்கும் இடையே கடும் மோதல் போக்கு நீடித்து வருகிறது.

இந்த நிலையில் தற்போது அமெரிக்காவில் டிரம்ப் நிர்வாகம் முடிந்து ஜோ பைடன் நிர்வாகம் ஆட்சி அதிகாரத்துக்கு வந்துள்ளது. ஈரான் அணுசக்தி ஒப்பந்தத்துக்கு இணங்கி நடந்தால் அமெரிக்கா மீண்டும் அந்த ஒப்பந்தத்தில் இணையும் என்று ஜோ பைடனின் நிர்வாகம் அண்மையில் அறிவித்தது.

இந்த நிலையில் அமெரிக்காவுடன் புதிய உறவை ஏற்படுத்துவதற்கு தயாராக இருப்பதாக ஈரான் அறிவித்துள்ளது.

இதுகுறித்து ஈரான் வெளியுறவு மந்திரி ஜாவத் ஷாரிப் கூறும்போது, ‘‘தோல்வியுற்ற டிரம்ப்பின் நிர்வாகக் கொள்கைகளைப் பயன்படுத்த அமெரிக்க ஜனாதிபதி ஜோ பைடன் விரும்பவில்லை. அதனால் அமெரிக்காவுக்கு வாய்ப்பு உள்ளது. ஆனாலும் அணுசக்தி ஒப்பந்தத்துக்கு அமெரிக்கா திரும்பி வருவதற்கான நேரம் வரம்பற்றது அல்ல. ஜோ பைடன் நிர்வாகத்துக்கு வரையறுக்கப்பட்ட வாய்ப்புகள் உள்ளன. எனவே அமெரிக்காவுடன் புதிய உறவை ஏற்படுத்துவதற்கு ஈரான் தயாராக உள்ளது’’ என்றார்.