பிகேஆர் துணைத் தலைவர் ரஃபிஸி ரம்லி, தீவிர அரசியலுக்குத் திரும்ப வேண்டும் என்ற கோரிக்கை வலுத்து வருகிறது. இது குறித்து கருத்து தெரிவித்த ரஃபிஸி தான் அரசியல் ஆர்வத்தை இழந்துவிட்டதாகவும், “என் இதயமும் ஆன்மாவும் தற்பொழுது அரசியலில் இல்லை” என்றும் கூறியுள்ளார்.
இருப்பினும், திரும்புவது பற்றி யோசித்துக்கொண்டிருந்தார். குறிப்பாக சக பிகேஆர் சகாக்கள் மற்றும் கட்சியின் அடிமட்டத்தில் இருந்து இதுபோன்ற அழைப்புகளில் இருந்து தப்ப முடியாது என்று ரஃபிஸி கூறினார். தீவிர அரசியலுக்குத் திரும்புவதற்கு முன் தனது குடும்பம், பணியாளர்கள் மற்றும் தனது டேட்டா நிறுவனமான இன்வோக்கில் உள்ள முதலீட்டாளர்களைக் கலந்தாலோசிக்க வேண்டும் என்று ரஃபிஸி கூறினார்.
அவர் மீண்டும் தீவிர அரசியலுக்கு வருவாரா என்பது குறித்தும், ஏப்ரலில் நடைபெறும் கட்சித் தேர்தலில் மீண்டும் கட்சியின் துணைத் தலைவர் பதவிக்கு போட்டியிடுவாரா என்பது குறித்தும் தனது முடிவை அறிவிப்பேன் என்று கூறினார்.
2018 பொதுத் தேர்தலில் (GE14) பாரிசான் நேஷனல் (பிஎன்) அரசாங்கத்தின் வீழ்ச்சியுடன் ஒரு அரசியல்வாதியாக தனது தனிப்பட்ட இலக்குகளை அடைந்துவிட்டதாக ரஃபிஸி கூறினார். மக்கள் வாக்குகள் மூலம் தம்மைத் தண்டிக்க முடியும் என்பதை இப்போது உணர்ந்திருப்பதால், தற்பெருமை மற்றும் கர்வத்துடன் இருக்க முடியாது என்பதை அரசாங்கத்தின் மாற்றம் அரசியல் கட்சிகளுக்கு உணர்த்தியது.
“என்னைப் பொறுத்தவரை, ஒரு அரசியல்வாதியாக, அது நிறைவேற்றப்பட்ட பணி.” 2019 டிசம்பரில் தீவிர அரசியலில் இருந்து விலகுவதாக ரஃபிஸி அறிவித்தார். அவர் தனது ஸ்டார்ட் அப் திட்டத்தில் கவனம் செலுத்த விரும்புவதாகக் கூறினார்.
நேஷனல் ஃபீட்லாட் கார்ப்பரேஷன் (NFC)) ஊழல் தொடர்பான ரகசிய வங்கி விவரங்களைக் கசியவிட்டதற்காக, அவர் மீது குற்றம் சாட்டப்பட்டு, பின்னர் விடுவிக்கப்பட்டபோது அவருக்கு ஆதரவு இல்லாததே ரஃபிஸியின் முடிவுக்குக் காரணம் என்று அவரது கட்சித் தோழர் சுபாங் நாடாளுமன்ற உறுப்பினர் வோங் சென் கூறினார். அப்போது, அரசியல் களத்திற்கு திரும்பும் எண்ணம் தனக்கு இல்லை என ரஃபிஸி கூறியிருந்தது குறிப்பிடத்தக்கது.
