கோத்தா கினாபாலு, பிப்ரவரி 24 :
மாவட்டம் முழுவதும் உடைத்து திருட்டு, கொள்ளை போன்ற நடவடிக்கைகளில் ஈடுபட்டிருந்த ‘Geng Gurun’ எனப்படும் கிரிமினல் குழுவின் தலைவன் உட்பட 4 பேர் போலீசாரால் கைது செய்யப்பட்டனர்.
32 முதல் 64 வயதுடைய அனைத்து சந்தேக நபர்களும் கோத்தா கினாபாலு மாவட்ட போலீஸ் தலைமையகம் (IPD) குற்றப் புலனாய்வுப் பிரிவினரால், இந்த மாத தொடக்கத்தில் இருந்து கோத்தா கினாபாலுவைச் சுற்றி மேற்கொள்ளப்பட்ட தொடர்ச்சியான கைதுகளில் தடுத்து வைக்கப்பட்டனர்.
கோத்தா கினாபாலு மாவட்ட காவல்துறைத் தலைவர், துணை ஆணையர் முகமட் ஜைதி அப்துல்லா கூறுகையில், பாதிக்கப்பட்ட ஒருவரின் வீட்டில் இருந்த சிசிடிவி பதிவின்படி, மேற்கொண்ட விசாரணையின் விளைவாக நான்கு சந்தேக நபர்களும் கைது செய்யப்பட்டனர் என்றார்.
கோத்தா கினாபாலுவில் இரண்டு வெளிநாட்டு ஆண்கள் மற்றும் 8 உள்ளூர்வாசிகளைக் கொண்ட குரூன் கும்பல் செயலில் உள்ள ஒரு குற்றவியல் குழுவாகும் என்று அவர் கூறினார்.
“இந்த கும்பல் கோத்தா கினாபாலுவில் மட்டும் 19 வீடு உடைப்பு வழக்குகளில் ஈடுபட்டுள்ளது, இதில் இரண்டு பெட்டகங்கள் மற்றும் ஒரு கைத்துப்பாக்கி திருட்டு வழக்குகள், துவாரானில் மூன்று வீடுகள் உடைப்பு வழக்குகள், கோத்தா மருது மற்றும் பேனாம்பாங்கில் தலா இரண்டு வீடுடைப்பு வழக்குகளில் இக்குழு ஈடுபட்டுள்ளது.
“நகைகள், மடிக்கணினிகள், பிராண்டட் கைப்பைகள் மற்றும் பிற மதிப்புமிக்க பொருட்கள் உட்பட திருடப்பட்ட பொருட்களின் மொத்த மதிப்பு RM520,000 ஐ எட்டியுள்ளது” என்று அவர் இன்று கோத்தா கினாபாலு மாவட்ட காவல்துறை தலைமையகத்தில் (IPD) நடந்த செய்தியாளர் கூட்டத்தில் கூறினார்.
மேலும் சந்தேக நபர்களிடம் நடத்திய விசாரணையில், கோத்தா கினாபாலு, கோத்தா பெலூட் ஆகிய இடங்களில் உள்ள அடகுக் கடையிலும், சந்தேக நபரின் வீட்டிலும் இருந்த வழக்குப் பொருள்கள் பறிமுதல் செய்யப்பட்டன.
“அதுமட்டுமல்லாமல், சிலாங்கூரில் உள்ள அம்பாங்கில் திருடப்பட்ட பொருட்களை வாங்கிய இரண்டு சந்தேக நபர்களிடமிருந்தும் அப்பொருட்கள் பறிமுதல் செய்யப்பட்டது. மொத்த பறிமுதல் தொகை RM200,000 ஆகும்.
“கோத்தா கினாபாலுவைச் சுற்றியுள்ள சொகுசு வீடுகளைக் கண்காணிப்பது இக் குற்றவியல் குழுவின் முக்கிய செயல்பாடாகும்.
“வீட்டில் ஆளில்லை என்று அவர்கள் நம்பும்போது, அவர்கள் வேலியைத் தாண்டி, இலக்கு வைக்கப்பட்ட வீட்டின் கதவுகள் மற்றும் ஜன்னல்களைத் திறந்து அல்லது உயர்த்தி உள்ளே நுழைவார்கள்.
“மதிப்புமிக்க பொருட்களை எடுத்துக்கொண்டு, கோத்தா கினாபாலு மற்றும் கோத்தா பெலூட்டில் உள்ள அடகுக் கடைகளில் விற்பார்கள், அல்லது அம்பாங்கில் திருடப்பட்ட பொருட்களை வாங்குபவர்களுக்கு அவை அனுப்பப்படும்,” என்று அவர் கூறினார்.
அனைத்து சந்தேக நபர்களும் திருட்டு, கொள்ளை மற்றும் போதைப்பொருள் துஷ்பிரயோகம் சம்பந்தப்பட்ட நான்கு முதல் 10 வழக்குகளுக்கான முந்தைய குற்றங்களைக் கொண்டுள்ளனர், அவற்றில் சில தண்டனை விதிக்கப்பட்டுள்ளன அல்லது விசாரணையில் உள்ளன.
கும்பலைச் சேர்ந்த மேலும் ஆறு பேர் இன்னும் தேடப்பட்டு வருவதாகவும், மேலதிக நடவடிக்கைக்காக இன்னும் தலைமறைவாக உள்ள சந்தேக நபர்களைப் பற்றிய தகவல்களை வழங்குமாறு பொதுமக்களிடம் கேட்டுக் கொள்ளப்பட்டதாகவும் முகமட் ஜைடி தெரிவித்தார்.
திருட்டு குற்றத்துக்கான தண்டனைச் சட்டம் 457வது பிரிவின் கீழ் வழக்குப் பதிவு செய்யப்பட்டு விசாரணை நடைபெற்று வருகிறது.
