ஜோகூர் பாரு: இந்தோனேஷியாவின் பிரபல ராக் இசைக்குழு ரட்ஜாவுக்கு கொலை மிரட்டல் விடுக்கப்பட்டது தொடர்பாக விசாரணைக்கு உதவ இரண்டு பேரை போலீசார் கைது செய்துள்ளனர்.
ஞாயிற்றுக்கிழமை (மார்ச் 12) பிற்பகல் 3.30 மணியளவில் ஜோகூர் பாரு தெற்கு மாவட்ட காவல்துறை தலைமையகத்தில் 37 மற்றும் 48 வயதுடைய சந்தேக நபர்கள் கைது செய்யப்பட்டதாக ஜோகூர் காவல்துறைத் தலைவர் டத்தோ கமருல் ஜமான் மாமத் தெரிவித்தார்.
இந்த வழக்கு குற்றவியல் மிரட்டலுக்கான தண்டனைச் சட்டம் பிரிவு 506 மற்றும் அவமதிப்பு நடத்தைக்கான சிறு குற்றச் சட்டம் 1955 இன் பிரிவு 14 இன் கீழ் விசாரிக்கப்படுகிறது. சந்தேக நபர்களில் ஒருவர் உள்ளூர் மற்றும் மற்றையவர் வெளிநாட்டவர் என்பது விசாரணையில் தெரியவந்துள்ளது என்று அவர் அறிக்கையில் தெரிவித்துள்ளார்.
வழக்கு தொடர்பான தகவல் தெரிந்தவர்கள் தங்கள் அருகிலுள்ள காவல் நிலையத்திற்கு வரலாம் அல்லது அழைக்கலாம் என்று அவர் மேலும் கூறினார். சனிக்கிழமை (மார்ச் 11) இரவு 11.15 மணியளவில் இங்குள்ள லார்கின் அரீனா உள்விளையாட்டு அரங்கில் நடந்த இசை நிகழ்ச்சிக்குப் பிறகு தங்களுக்கு கொலை மிரட்டல் வந்ததாக இசைக்குழுவினர் கூறியதாக முன்னர் தெரிவிக்கப்பட்டது.
குழுவின் பாடகர் இயன் கசேலா, அவர்களுக்கும் ஏற்பாட்டாளர்களுக்கும் இடையே தவறான புரிதல் ஏற்பட்டது என்று கூறினார்.
