லிப்பீஸ், ஜனவரி 12:
இன்று, கேச்சாவ் அருகே உள்ள ஜாலான் லிப்பீஸ் – மெராபோஹ் சாலையின் 23ஆவது கிலோமீட்டரில், பள்ளிக்குச் சென்று கொண்டிருந்த மாணவர் ஒருவரது மோட்டார் சைக்கிள் மீது கார் மோதியதில், மாணவர் சம்பவ இடத்திலேயே உயிரிழந்தார்.
லிப்பீஸ் மாவட்ட காவல்துறைத் தலைவர், கண்காணிப்பாளர் அஸ்லி முகமட் நூர் இச் சம்பவம்பற்றிக் கூறுகையில், மோடெனாஸ் கிறிஸ் 100 வகை மோட்டார் சைக்கிளில் சென்ற மாணவர் அஹமட் மஜிதி எஸ்வாடி (19) என அடையாளம் காணப்பட்டுள்ளார். அவரின் தலை மற்றும் மார்பில் பலத்த காயம் காரணமாக சம்பவ இடத்திலேயே உயிரிழந்தார்.
காலை 7 மணியளவில் நடந்த இந்த விபத்தின் போது, பாதிக்கப்பட்டவர் பாடாங் தெங்கு சமய மேல்நிலைப் பள்ளிக்கு (SMA) சென்று கொண்டிருந்தார், அதே நேரத்தில் 75 வயதான மிட்சுபிஷி வகை காரை ஓட்டிவந்தவர் கேச்சாவில் உள்ள மரத் தொழிற்சாலைக்கு சென்று கொண்டிருந்த போதே விபத்து ஏற்பட்டது.
“முதற்கட்ட விசாரணையில், கார் ஓட்டுநர் தனது வாகனத்தை கட்டுப்படுத்த தவறி, எதிர் பாதையில் நுழைந்து பாதிக்கப்பட்டவரின் மோட்டார் சைக்கிள் மீது மோதியதால் விபத்து ஏற்பட்டதாக நம்பப்படுகிறது.
“மோதலின் விளைவாக, பலத்த காயமடைந்த மாணவர் சம்பவ இடத்திலேயே இறந்தார், கார் ஓட்டுநர் தலை மற்றும் வலது காலில் காயம் அடைந்தார்,” என்று அவர் இன்று வெளியிட்டுள்ள அறிக்கையில் தெரிவித்துள்ளார்.
கார் ஓட்டுநர் லிப்பீஸில் உள்ள மருத்துவமனைக்கு சிகிச்சைக்காக அனுப்பப்பட்டதாக அஸ்லி கூறினார், அதே நேரத்தில் அஹமட் மஜிதியின் உடல் பிரேத பரிசோதனைக்காக அதே மருத்துவமனைக்கு எடுத்துச் செல்லப்பட்டது, பின்னர் அடக்கம் செய்வதற்காக அவரது சடலம் குடும்பத்தினரிடம் ஒப்படைக்கப்பட்டது.
கார் ஓட்டுநருக்கு மது மற்றும் போதைப்பொருள் பழக்கம் உள்ளதா என்பதைக் கண்டறிய, அவர்கள் இரத்த மாதிரிகள் மற்றும் சிறுநீர் பரிசோதனையும் செய்தனர் என்றார்.
சாலை போக்குவரத்து சட்டம் 1987 பிரிவு 41 (1)ன் கீழ் இந்த வழக்கு விசாரிக்கப்பட்டு வருவதாக அவர் கூறினார்.
