பத்து பாகாட், செப்டம்பர் 14 :
இங்குள்ள சுங்கை சிம்பாங் கானானில் நான்கு மணிநேரம் தொடர்ந்து பெய்த கனமழையின் விளைவாக, ஸ்ரீ காடிங்கைச் சுற்றியுள்ள பல இடங்களில் அதிக அலையுடன் கூடிய திடீர் வெள்ளம் ஏற்பட்டு, சுமார் 600 பேர் பாதிக்கப்பட்டுள்ளனர்.
தாமான் ஸ்ரீ பாஞ்சோர், கம்போங் செங்குவா, கம்போங் பத்து காடிங் மற்றும்பெக்கான் ஸ்ரீ காடிங் ஆகிய பகுதிகள் பாதிக்கப்பட்ட பகுதிகள் என்று பத்து பாகாட் மாவட்ட காவல்துறை தலைவர், துணை ஆணையர் இஸ்மாயில் டோலா தெரிவித்தார்.
“அதிகாலை 1.30 மணி முதல் அதிகாலை 5.30 மணி வரை நீடித்த கனமழையால், அதிகாலை 3 மணியளவில் அதிக அலையுடன் கூடிய வெள்ளம் ஏற்பட்டது. “இதனால் ஆற்றில் வெள்ளம் பெருக்கெடுத்து ஓடியது என்று, இன்று புதன்கிழமை (செப். 14) அவர் வெளியிட்டுள்ள அறிக்கையில் தெரிவித்தார்.
காவல்துறை, தீயணைப்பு மற்றும் மீட்புத் துறை, குடிமைத் தற்காப்புப் படை, சமூக நலத் துறை மற்றும் மாவட்ட சுகாதார மையம் ஆகிய துறைகளின் 25 பணியாளர்கள் மற்றும் அதிகாரிகளைக் கொண்ட ஒருங்கிணைந்த குழுவுடன் மீட்பு நடவடிக்கை உடனடியாக தொடங்கப்பட்டது என்று ஏசிபி இஸ்மாயில் கூறினார்.
“ஆரம்பத்தில், SK ஸ்ரீ காடிங்கில் ஒரு நிவாரண மையம் திறக்கப்பட்டது, ஆனால் வெள்ள நீர் பெருகியதால் நாங்கள் அதை SMK ஸ்ரீ காடிங்கிற்கு மாற்ற வேண்டியிருந்தது.
“பாதிக்கப்பட்டவர்களை வெளியேற்றுவதற்கான முயற்சிகள் தற்போது நடைபெற்று வருகின்றன. வெள்ளத்தால் பாதிக்கப்பட்ட 190 குடும்பங்களைச் சேர்ந்த சுமார் 600 பேர் பாதிக்கப்பட்டுள்ளனர்,” என்று அவர் மேலும் கூறினார்.
ஏசிபி இஸ்மாயில் மேலும் கூறுகையில், பத்து பாகாட்டை மற்ற அருகிலுள்ள மாவட்டங்களுடன் இணைக்கும் அனைத்து முக்கிய சாலைகளும் இன்னும் அனைத்து வாகனங்களும் பயன்படுத்தப்படும் நிலையிலேயே உள்ளது என்றார்.
