ஜோகூர் பாரு, செப்டம்பர் 21 :
புதுமணத் தம்பதிகளின் கார் மற்றும் வீட்டில் சிவப்பு நிற சாயம் அடித்து, காரை தீயிட்டு சிறிதளவு எரித்ததால், அவர்களின் தேனிலவு ஆனந்தம் ஒரு கனவுபோல மாறியது.
கடந்த சனிக்கிழமை தேனிலவு முடித்து திரும்பி வந்ததும், ஜி. ஷாமினியும் அவரது கணவரும் தாமான் எஹ்சன் ஜெயா வீட்டில் தூங்கிக் கொண்டிருந்தபோது, அண்டை வீட்டாரின் அழைப்பு அவர்களை அதிர்ச்சிக்குள்ளாக்கியது.
“வழக்கமாக காலை 6 மணிக்கு வேலைக்குச் செல்லும் எனது பக்கத்து வீட்டுக்காரர், எனது கார் மற்றும் முன் வாயிலில் சிவப்பு வண்ணம் பூசப்பட்டிருப்பதைப் பற்றி எச்சரித்தார்.
“எங்களது காரும் எரிக்கப்பட்டது, வழக்கமாக கேட் அருகே ஓய்வெடுக்கும் என் நாய்க்கும் சிவப்பு வண்ணப்பூச்சு தெளிக்கப்பட்டது,” என்று அவர் நேற்று கூறினார்.
அவரது வீட்டில் இருந்த கண்காணிப்பு கேமரா காட்சிகளின் அடிப்படையில், தொப்பி மற்றும் முகமூடி அணிந்த ஒரு நபர், அதிகாலை 3.03 மணியளவில் அவரது வீட்டின் முன் ஒரு வெள்ளை காரில் இருந்து இறங்கி, பெயிண்ட் தெளித்தும் மற்றும் ஒரு பாட்டிலை எறிந்து அவரது காரை எரிப்பதையும் அது காட்டியது.
“அடுத்த முறை எரிக்கப்படும்” என்று எழுதப்பட்ட ஒரு குறிப்பு அவரது முன் வாசலில் காணப்பட்டது.
ஷாமினி மேலும் கூறுகையில், தானோ அல்லது அவரது கணவரோ எந்தவொரு சட்டவிரோத கடன் வழங்குபவர்களிடமிருந்தும் கடன் வாங்கவில்லை என்றும் “எங்களுக்கு எதிரிகள் இல்லை என்றாலும் இது பழிவாங்கும் செயலா என்று எனக்குத் தெரியவில்லை,” என்றும் அவர் கூறினார்.
சிங்கப்பூரில் வாடிக்கையாளர் சேவை நிர்வாகியாக பணிபுரியும் 31 வயதான அவர், செப்டம்பர் 10 ஆம் தேதி தாங்கள் திருமணம் செய்து கொண்டதாகவும், தங்கள் வாழ்க்கையின் புதிய அத்தியாயத்திற்கு மகிழ்ச்சியான தொடக்கத்தை எதிர்பார்த்துக் கொண்டிருப்பதாகவும் கூறினார்.
“மாறாக, இந்த சம்பவத்தால் நாங்கள் மன அழுத்தத்திற்கு ஆளாகியுள்ளோம், மேலும் இந்த விஷயங்களைச் சரிசெய்ய கூடுதல் நாட்கள் வேலையிலிருந்து விடுப்பு எடுக்க வேண்டியிருந்தது, மற்றும் இதனால் எங்களுக்கு சுமார் RM3,000 செலவாகியது என்றார்.
“எங்களுடன் வசிக்கும் என் மாமியார், எங்கள் பாதுகாப்பைப் பற்றி மிகவும் கவலைப்படுகிறார்” என்றார்.
ஸ்ரீ ஆலாம் மாவட்ட காவல்துறை துணைத் தலைவர், முகமட் சொஹைமி இஷாக் கூறுகையில், குறித்த சம்பவம் தொடர்பில் போலீஸ் புகார் செய்யப்பட்டதை உறுதிப்படுத்தினார், மேலும் இது தொடர்பில் விசாரணைகள் நடந்து வருகின்றன என்றார்.