மாஸ்கோ: நான்கு நாள் உத்தியோகபூர்வ பயணமாக டத்தோஸ்ரீ அன்வார் இப்ராஹிம் செவ்வாய்க்கிழமை (மே 13) மாஸ்கோ சென்றடைந்தார். உள்ளூர் நேரப்படி மாலை 6.26 மணிக்கு (மலேசிய நேரப்படி இரவு 11.26) வுனுகோவோ-2 விமான நிலையதத்திற்கு சென்றடைந்தார். கிட்டத்தட்ட இரண்டு தசாப்தங்களில் ஒரு மலேசிய பிரதமருக்கு வழங்கப்பட்ட முதல் அதிகாரப்பூர்வ வரவேற்பு விழா இதுவாகும். ஐந்தாவது பிரதமர் மறைந்த துன் அப்துல்லா அகமது படாவி 2007 இல் ரஷ்யாவிற்கு உத்தியோகபூர்வ விஜயம் செய்தபோது அவருக்கு வழங்கப்பட்ட கடைசி வரவேற்பு இதுவாகும்.
ரஷ்யாவிற்கான மலேசிய தூதர் டத்தோ சியோங் லூன் லாய் அன்வாரை வரவேற்றார். அதே நேரத்தில் துணை வெளியுறவு அமைச்சர் ஆண்ட்ரி ருடென்கோ ரஷ்ய அரசாங்கத்தின் சார்பாக அவரை வரவேற்றார். மே 13 முதல் 16 வரை நடைபெறும் இந்த உத்தியோகபூர்வ விஜயம் ரஷ்ய ஜனாதிபதி விளாடிமிர் புடினின் அழைப்பின் பேரில் நடைபெறுகிறது. இந்த பயணத் திட்டத்தில் மாஸ்கோ, டாடர்ஸ்தான் குடியரசின் தலைநகரான கசானில் பங்கேற்பது அடங்கும்.
நிதியமைச்சராகவும் இருக்கும் அன்வாருடன், வெளியுறவு அமைச்சர் டத்தோஸ்ரீ முகமது ஹசான், வேளாண்மை உணவுப் பாதுகாப்பு அமைச்சர் டத்தோஸ்ரீ முகமது சாபு, அறிவியல், தொழில்நுட்பம் கண்டுபிடிப்பு அமைச்சர் சாங் லி காங், உயர்கல்வி அமைச்சர் டத்தோஸ்ரீ டாக்டர் சாம்ப்ரி அப்துல் காதிர் மற்றும் தோட்டக்கலை பொருட்கள் அமைச்சர் டத்தோஸ்ரீ ஜோஹாரி அப்துல் கானி உள்ளிட்ட உயர்மட்டக் குழுவும் வருகிறது.
செவ்வாய்க்கிழமை இரவு ரஷ்யாவில் வசிக்கும் மலேசியர்களுடனான சந்திப்புடன் இந்தப் பயணம் தொடங்கியது, புதன்கிழமை (மே 14) அன்வார் சுமார் 20 ரஷ்ய தொழில்துறை தலைவர்களுடன் ஒரு வட்டமேசை கலந்துரையாடலில் பங்கேற்க உள்ளார். பிரதமர் தனது சகாவான மிகைல் மிஷுஸ்டினுடன் இருதரப்பு சந்திப்புகளையும் நடத்துவார் மற்றும் ஜனாதிபதி புடினுடனான சந்திப்பில் கலந்து கொள்வார்.
வியாழக்கிழமை (மே 15) அன்வார் மாஸ்கோ மாநில அனைத்துலக உறவுகள் நிறுவனத்தில் (MGIMO) பொது சொற்பொழிவு ஆற்றுவார். அங்கு அவருக்கு உலகளாவிய அமைதி அனைத்துலக ஒத்துழைப்புக்கான அவரது பங்களிப்புகளை அங்கீகரிக்கும் வகையில் கௌரவ டாக்டர் பட்டம் வழங்கப்படும்.
கசானில், பிரதமர் டாடர்ஸ்தான் குடியரசின் தலைவர் ருஸ்தம் மின்னிகனோவை சந்தித்து, ரஷ்யா-இஸ்லாமிய உலக மூலோபாய பார்வை குழு கூட்டத்தில் ஒரு முக்கிய உரையை நிகழ்த்துவார். அவரது கசான் வருகையின் சிறப்பம்சம் 16ஆவது ரஷ்யா-இஸ்லாமிய உலகம்: கசான் மன்றத்தில் பங்கேற்பதாகும். அங்கு அவர் முழுமையான அமர்வின் போது ஒரு முக்கிய உரையை நிகழ்த்த அழைக்கப்படுகிறார்.
ரஷ்யாவிற்கும் இஸ்லாமிய நாடுகளுக்கும் இடையிலான பொருளாதார ஒத்துழைப்பை வளர்ப்பதற்கான ஒரு முக்கிய தளமாக கசான் மன்றம் உள்ளது. 2024ஆம் ஆண்டு நிலவரப்படி, ஐரோப்பிய நாடுகளில் ரஷ்யா மலேசியாவின் ஒன்பதாவது பெரிய வர்த்தக பங்காளியாக உள்ளது. மொத்த வர்த்தகம் RM11.46 பில்லியன் (US$2.48 பில்லியன்) மதிப்புடையது.
