முன்னாள் மனிதவள அமைச்சர் எம். சரவணனின் 12 வயது மகனிடம் சொத்து விவரங்களை அறிவிப்பதற்கான அறிவிப்பை வழங்கியதாகக் கூறப்படுவதை மலேசிய ஊழல் தடுப்பு ஆணையம் (MACC) மறுத்துள்ளது. இத்தகைய அறிவிப்புகளைப் பெறுபவர்களுக்குச் சட்டத்தில் குறிப்பிட்ட வயது வரம்பு எதுவும் குறிப்பிடப்படவில்லை என்றாலும், சரவணனின் மகனின் விஷயத்தில் ஆணையம் தனது அதிகார வரம்பிற்குட்பட்ட விவேகமான முடிவை மேற்கொண்டதாக MACC-யின் தலைமை ஆணையர் அப்துல் ஹலீம் அமன் தெரிவித்தார்.
சட்டத்தின்படி, ஒரு நபர் பெரியவரா அல்லது குழந்தையா என்பது போன்ற குறிப்பிட்ட வயது வரம்பு எதுவும் குறிப்பிடப்படவில்லை. உறவினர்கள் அல்லது நெருங்கிய தொடர்பில் உள்ளவர்கள் என்பது மட்டுமே குறிப்பிடப்பட்டுள்ளது. எனவே, அந்த 12 வயது சிறுவனின் விஷயத்தில், நாங்கள் எங்கள் விவேகத்தைப் பயன்படுத்தி, எது நியாயமானது என்று பரிசீலித்தோம். அவரது 12 வயது மகனிடம் அறிவிப்பை வழங்க வேண்டாம் என்று நாங்கள் முடிவு செய்தோம் என்று அவர் கூறியதாக ‘ஹரியான் மெட்ரோ’ செய்தி வெளியிட்டுள்ளது.
சரவணன், அவரது மனைவி மற்றும் குழந்தைகள் ஆகியோருக்கு MACC ஏற்கெனவே அறிவிப்புகளை வழங்கியிருந்ததாகவும், ஆனால் குடும்ப உறுப்பினர்கள் சிலர் வெளிநாட்டில் இருந்ததால் அவர்களால் நேரில் ஆஜராக முடியவில்லை என்றும் ஹலீம் கூறினார். அந்த 12 வயது சிறுவன் MACC தலைமையகத்தில் இருந்ததாலேயே, விசாரணை தொடர்பான அறிவிப்பைப் பெறுவதற்காக அவன் அங்கு வந்திருந்தான் என்று அர்த்தமல்ல என்றும் அவர் கூறினார். அறிவிப்பைப் பெறுவதற்காக அந்தச் சிறுவன் நேரில் வரவில்லை. அவன் தனது பெற்றோருடன் வந்திருந்தான் அவ்வளவுதான் என்று அவர் கூறினார்.
சரவணனின் 12 வயது மகனை அறிவிப்பைப் பெறுவதற்காகத் தலைமையகத்தில் ஆஜராகுமாறு கூறியதன் மூலம் MACC தனது அதிகாரத்தைத் தவறாகப் பயன்படுத்தியதாக முன்னாள் அமைச்சர் பி. வேத மூர்த்தி முன்பு குற்றம் சாட்டியிருந்தார்.
சரவணனும் அவரது குடும்பத்தினரும் தங்கள் சொத்து விவரங்களை அறிவிக்குமாறு கோரும் அறிவிப்புகளைப் பெறுவதற்காக திங்களன்று புத்ராஜெயாவில் உள்ள MACC தலைமையகத்திற்குச் சென்றிருந்தனர். குழந்தையின் பெற்றோரான தன்னிடம் அந்த அறிவிப்பை வழங்கியிருக்க முடியும் என்று வாதிட்ட சரவணன், தனது 12 வயது மகனை வரவழைத்த MACC-யின் முடிவை கேள்விக்குள்ளாக்கியிருந்தார். வெளிநாட்டுத் தொழிலாளர் ஒதுக்கீடுகளுக்கு ஒப்புதல் அளித்தது தொடர்பான ஊழல் குற்றச்சாட்டு குறித்து சரவணன் மீது MACC நடத்தி வரும் விசாரணையின் ஒரு பகுதியாகவே இந்த அறிவிப்புகள் வழங்கப்பட்டன.
