பெர்சத்து கட்சி, பெர்லிஸ் மாநில மந்திரி பெசார் அபு பக்கர் ஹம்ஸாவை அக்டோபர் 14 முதல் அமலுக்கு வரும் வகையில் கட்சியிலிருந்து இடைநீக்கம் செய்துள்ளது. பெர்லிஸ் மாநில பெர்சத்து தலைவர் இஜிசாம் இப்ராஹிம், அபு பக்கர் கட்சியின் இரண்டு தேர்தல் சுழற்சிகளுக்கு இடைநீக்கம் செய்யப்பட்டுள்ளதை உறுதிப்படுத்தியதாக ‘பெரித்தா ஹாரியான்’ செய்தி வெளியிட்டுள்ளது.
கோல பெர்லிஸ் சட்டமன்ற உறுப்பினரான அபு பக்கருக்கு, இந்த இடைநீக்கம் குறித்த கடிதம் கடந்த வாரமே அனுப்பப்பட்டதாகவும் அவர் தெரிவித்தார். ஆம், கடந்த வாரம் கடிதம் அனுப்பப்பட்டது உண்மைதான். ஆனால், அதை நான் விநியோகிக்கவில்லை. தற்போதைக்கு, கட்சியின் மத்திய தலைமை பாஸ் கட்சி சட்டமன்ற உறுப்பினர்களிடமிருந்து அதிகாரப்பூர்வ முடிவிற்காக நாங்கள் காத்திருக்கிறோம் என்று அவர் கூறினார்.
அக்டோபர் 14 தேதியிட்ட அந்த கடிதத்தில், பெர்சத்து ஒழுங்கு நடவடிக்கைக் குழுவின் தலைவர் ராட்ஸி மனான் கையொப்பமிட்டுள்ளார். அக்டோபர் 13 அன்று கூடிய அக்குழு, பெர்சத்து கட்சியின் அரசியலமைப்பின் பிரிவு 22.5இன் கீழ் அபு பக்கரின் உறுப்பினர் தகுதியை இடைநீக்கம் செய்ய முடிவு செய்துள்ளதாக அதில் குறிப்பிடப்பட்டுள்ளது. கட்சியின் அரசியலமைப்பின் பிரிவு 9.1.4-ஐ மீறியது மற்றும் கட்சியின் நடத்தை விதிகளை மீறியதற்காக இந்த நடவடிக்கை எடுக்கப்பட்டுள்ளதாகத் தெரிகிறது.
மேலும், பெர்சத்து கட்சியில் அபு பக்கர் வகித்த பதவிகள் பறிக்கப்பட்டுள்ளன; இடைநீக்க காலத்தில் அவர் கட்சியின் சார்பாக எந்தவொரு அறிக்கையையும் வெளியிடக்கூடாது என்றும் தடை விதிக்கப்பட்டுள்ளது. இந்த இடைநீக்கம் குறித்து, கடிதம் வழங்கப்பட்ட நாளிலிருந்து 14 நாட்களுக்குள் கட்சியின் மேல்முறையீட்டு வாரியத்திடம் அபு பக்கர் மேல்முறையீடு செய்யலாம் என்று அந்தக் கடிதத்தில் தெரிவிக்கப்பட்டுள்ளது.
கடந்த ஜூலை மாதம், அபு பக்கர் மற்றும் மாநில நிர்வாகக் குழு உறுப்பினர் மார்ஜிதா மன்சோர் ஆகியோர் பெர்சத்து கட்சியின் உச்சமன்றக் குழுவிலிருந்து விலகியதாகத் தெரிவிக்கப்பட்டிருந்தது; இருப்பினும், அவர்கள் தொடர்ந்து கட்சியின் உறுப்பினர்களாகவே நீடித்தனர். பெர்லிஸ் மாநில நிர்வாகத்தில் முழு கவனம் செலுத்துவதற்காகவே தான் பதவி விலகியதாக அபு பக்கர் கூறினார். தங்களது நிர்வாகத்தின் பதவிக்காலம் இன்னும் ஓராண்டு மட்டுமே எஞ்சியுள்ள நிலையில், உச்சமன்றக் குழு கூட்டங்களில் கலந்துகொள்வதில் தங்களுக்குச் சிரமம் இருந்ததாக அவர் குறிப்பிட்டார்.
