கிள்ளான், பிப்ரவரி 22 :
இங்குள்ள தாமான் கிள்ளான் ஜெயாவில், ஒரு மாதத்திற்கும் மேலாக செயல்பட்டு வந்ததாக நம்பப்படும் வரி விதிக்கப்படாத மதுபானக் கடத்தல் கும்பலின் சட்டவிரோத நடவடிக்கைகள், நேற்று மலேசிய கடல்சார் போலீசாரால் முடிவுக்கு கொண்டுவரப்பட்டது.
உள்ளூர் சந்தையில் மதுபானங்களை விநியோகிப்பதற்கும் இடம்விட்டு இடம் நகர்த்துவதற்கும் லோரிகள் மற்றும் கார்களை இக் கடத்தல் கும்பல் பயன்படுத்தியதாக நம்பப்படுகிறது.
இருப்பினும், இந்த தந்திரத்தை போர்ட் கிள்ளான் கடல்சார் போலீஸ் படை (PPM) வெற்றிகரமாக மோப்பம் பிடித்தது, நேற்று நண்பகல் 12 மணியளவில் பூங்காவின் வாகன நிறுத்துமிடத்தில் மதுபானங்களை பறிமுதல் செய்ததத்துடன் மூன்று பேரையும் கைது செய்தனர்.
தமது கட்சியினரின் தகவல் மற்றும் உளவுத்துறையின் விளைவாக, இந்த Op Kontraband நடவடிக்கை மேற்கொள்ளப்பட்டு, மூவர் கைது செய்யப்பட்டதாக PPM மண்டல 1 கமாண்டர், துணை ஆணையர் ஷம்சோல் காசிம் கூறினார்.
சோதனையின் போது, 23 முதல் 32 வயதுடைய மூவர், இரண்டு லோரிகளுக்குப் பின்னால் சரக்குகளை பரிமாற்றும் நடவடிக்கைகளை மேற்கொண்டதாக அவர் கூறினார்.
“ஆய்வின் முடிவில் அவர்கள் வரி செலுத்தாத மதுபானங்களை மாற்றியது கண்டறியப்பட்டது. அதுமட்டுமின்றி, மற்றொரு தோயோத்தா எஸ்டிமா காரும் இதேபோன்ற செயல்களில் ஈடுபட்டது கண்டறியப்பட்டது.
“பறிமுதல் செய்யப்பட்ட மதுபானங்கள் மற்றும் வாகனங்களின் மொத்த மதிப்பு RM653,534 என்று மதிப்பிடப்பட்டுள்ளது. சோதனையில் கைது செய்யப்பட்ட மூன்று சந்தேக நபர்களும் முறையே இரண்டு உள்ளூர் ஆடவர்கள் மற்றும் ஒருவர் இந்திய பிரஜை எனவும் கண்டறியப்பட்டது.
கைது செய்யப்பட்ட மற்றும் பறிமுதல் செய்யப்பட்ட அனைத்து பொருட்களும் மேலதிக நடவடிக்கைக்காக போர்ட் கிள்ளான் PPM தளத்திற்கு கொண்டு வரப்பட்டன, ”என்று அவர் இங்கே கூறினார்.
இந்த வழக்கு சுங்கச் சட்டம் 1967 மற்றும் குடிவரவுச் சட்டம் 1959/63 இன் படி விசாரிக்கப்பட்டது என்றும், கைது செய்யப்பட்டவர்கள் மற்றும் பறிமுதல்கள் மேல் நடவடிக்கைக்காக தெற்கு கிள்ளான் மாவட்ட காவல்துறை தலைமையகத்தின் (IPD) விசாரணை அதிகாரியிடம் ஒப்படைக்கப்பட்டது என்றும் அவர் கூறினார்.
