ஷா ஆலாம், மார்ச் 16 :
கடந்த ஆண்டு இறுதியில் சிலாங்கூர் மாநிலத்தில் ஏற்பட்ட பெரும் வெள்ளத்தால் பாதிக்கப்பட்டவர்களுக்கு, மாநில அரசால் ஒதுக்கப்பட்ட Bantuan Selangor Bangkit (BSB) உதவியை, மொத்தம் 8,395 பெறுநர்கள் இன்னும் பெறவில்லை என்று மந்திரி பெசார் டத்தோஸ்ரீ அமிருடின் ஷாரி தெரிவித்துள்ளார்.
வெள்ள நிவாரண உதவி (BSB) பெறாதவர்களில் கிள்ளான் மாவட்டத்தில் (7,236 பேர்) அதிக எண்ணிக்கையில் இருப்பதாக அவர் கூறினார்; அதைத் தொடர்ந்து கோலா லங்காட் (530 பேர்), பெட்டாலிங் (348 பேர்), செப்பாங் (223 பேர்), கோலா சிலாங்கூர் (56 பேர்) மற்றும் கோம்பாக் (2 பேர்) ஆகிய மாவட்டங்களில் உள்ளனர்.
மேலும், உலு லங்காட், சபாக் பெர்னாம் மற்றும் உலு சிலாங்கூர் ஆகிய மூன்று மாவட்டங்களுக்கு வெள்ள நிவாரண உதவிகள் (BSB) முழுமையாக வழங்கப்பட்டுள்ளன என்றார்.
“மார்ச் 14 நிலவரப்படி, RM118.11 மில்லியன் ஒதுக்கீட்டை உள்ளடக்கிய, 118,110 குடும்பங்களுக்கு BSB கொடுப்பனவுகளை மாநில அரசாங்கம் அங்கீகரித்து அனுப்பியுள்ளது. இதற்கிடையில், இறந்த 25 பேரில், 14 பேரின் குடும்பங்கள் BSB உதவியைப் பெற தகுதியுடையவர்கள்,” என்று, இன்று நடந்த மாநில சட்டசபை அமர்வின்போது அமிருடின் கூறினார்.
அவரது கூற்றுப்படி, மொத்தம் RM132.628 மில்லியன் BSB உதவியானது அனைத்து மாவட்ட அலுவலகங்களுக்கும் பகிர்ந்தளிக்கப்பட்டது. மேலும் மொத்த நிலுவைத் தொகை RM14.378 மில்லியனாக உள்ளது என்றும் அவர் கூறினார்.
வெள்ளத்தால் பாதிக்கப்பட்ட அனைவருக்கும் BSB பணம் கொடுக்கப்பட்டதா என்று அஸ்மிசாம் ஜமான் ஹூரியின் (PH-Port Klang) கேள்விக்கு அவர் பதிலளித்தார்.
அதே நேரத்தில், BSB உதவித்தொகைக்கான விண்ணப்பத்தில், நிபந்தனைகளை பூர்த்தி செய்யாத மொத்தம் 2,942 விண்ணப்பங்கள் நிராகரிக்கப்பட்டன, மேலும் சில விண்ணப்பங்கள் ஒன்றுடன் ஒன்று முரணாக இருப்பது கண்டறியப்பட்டது, அதே நேரத்தில் 300 விண்ணப்பங்கள் இன்னும் மதிப்பாய்வு செய்யும் பணியில் உள்ளன என்றார்.
அத்தோடு அனைத்து BSB கொடுப்பனவுகளும் மார்ச் 31 ஆம் தேதிக்குள் வழங்கப்பட்டுவிடும் என்று எதிர்பார்க்கப்படுகிறது, அதே நேரத்தில் நிலுவையில் உள்ள BSB கொடுப்பனவுகள் மற்றும் மேல்முறையீட்டு விண்ணப்பங்கள் ஏப்ரல் 30 வரை செயல்பாட்டிலிருக்கும் என்றும் அமிருடின் கூறினார்.
” நாங்கள் இனி அரங்குகளில் BSB கொடுப்பனவுகளை வழங்குவதற்கு ஏற்பாடு செய்ய மாட்டோம், மீதமுள்ள பெறுநர்கள் நேரடியாக தொடர்பு கொள்ளப்படுவார்கள் மற்றும் மின்னணு நிதி பரிமாற்றம் (EFT) மூலம் அவர்களின் கணக்குகளில் பணம் செலுத்துவோம்,” என்று அவர் கூறினார்.
மேலும் தவறான BSB உரிமைகோரல்களைச் செய்த நபர்கள் மீது என்ன நடவடிக்கை எடுக்கப்படும் என்ற அஸ்மிசாமின் கேள்விக்கு, மார்ச் 31 அன்று அனைத்து BSB கொடுப்பனவுகளும் முடிந்த பிறகு, இதுதொடர்பில் நடவடிக்கை எடுக்கப்படும் என்று அமிருடின் கூறினார்.
அத்தோடு, உதவித்தொகை வழங்குவதில் தாமதம் ஏற்பட்டதற்குக் காரணம், மாநில அரசுக்கு அதிக எண்ணிக்கையிலான விண்ணப்பங்கள் வந்ததால், அதாவது தற்காலிக வெள்ள நிவாரண மையங்களுக்கு (PPS) மாற்றப்பட்ட குடும்பத் தலைவர்களின் எண்ணிக்கையை விட 10 மடங்கு அதிகமான விண்ணப்பங்கள் கிடைத்தன என்றும் அவர் விளக்கினார்.
“அது தவிர, சரிபார்ப்பு செய்யப்பட வேண்டிய ஒன்றுடன் ஒன்று வேறுபாடும் விண்ணப்பங்கள் இருந்தன, மேலும் நாங்கள் நிதிகளை ஏற்பாடு செய்து ஒருங்கிணைக்க வேண்டியிருந்தது, ஏனெனில் மாநில அரசாங்கம் BSB கொடுப்பனவை மத்திய அரசாங்கத்தின் இரக்க உதவித் தொகையுடன் சேர்த்தது,” என்று அவர் கூறினார்.
