சிபு, ஜூலை 29 :
சுங்கை பிடுட் என்ற இடத்தில் போலீசார் மேற்கொண்ட சோதனையில் 34 கஞ்சா செடிகள் கைப்பற்றப்பட்ட நிலையில், மூன்று பெண்கள் மற்றும் இரண்டு ஆண்கள் கைது செய்யப்பட்டுள்ளனர்.
இன்று வெள்ளிக்கிழமை (ஜூலை 29) நடந்த ஒரு செய்தியாளர் கூட்டத்தில் பேசிய சரவாக் துணை போலீஸ் கமிஷனர் டத்தோ மஞ்சா அட்டா கூறுகையில், ஜூலை 27 ஆம் தேதி காலை 7.30 மணி முதல் மாலை 3.30 மணி வரை சுங்கை பிடுட்டில் உள்ள தோட்டத்தில் போதைப்பொருள் குற்றப் புலனாய்வுத் துறையினர் நடத்திய சோதனையில் சந்தேக நபர்கள் அனைவரும் கைது செய்யப்பட்டதாகக் கூறினார்.
” அவர்களிடமிருந்து RM56,346 மதிப்புள்ள 34 கஞ்சா செடிகளை பறிமுதல் செய்தனர். மேலும் RM40,000 மதிப்புள்ள வாகனமும் பறிமுதல் செய்யப்பட்டது,” என்று அவர் கூறினார்.
சந்தேகநபர்கள் 29 முதல் 59 வயதுடையவர்கள், ஒரு ஆண் மற்றும் இரண்டு பெண்கள் – மூன்று உள்ளூர்வாசிகள் என்றும் மீதமுள்ள ஒரு ஆணும் பெண்ணும் வெளிநாட்டவர்கள் என்றும் அனைத்து சந்தேக நபர்களுக்கும் கடந்தகால குற்றவியல் பதிவுகள் எதுவும் இல்லை என்றார்.
அனைத்து சந்தேக நபர்களும் ஆபத்தான போதைப்பொருள் சட்டம் 1952 இன் பிரிவு 6B இன் கீழ் விசாரிக்கப்பட்டு வருவதாகவும், உள்ளூர் ஆண் சந்தேக நபர் ஒருவர் கூடுதலாக அதே சட்டத்தின் பிரிவு 15 (1) a) இன் கீழ் விசாரிக்கப்படுவதாகவும் கூறினார்.
சந்தேகநபர்கள் ஐவரையும் சனிக்கிழமை (ஜூலை 30) வரை இரண்டு நாட்களுக்கு விளக்கமறியலில் வைக்குமாறு நீதவான் நீதிமன்றம் வியாழக்கிழமை (ஜூலை 27) உத்தரவிட்டுள்ளதாக அட்டா கூறினார்.
“குற்றம் நிரூபிக்கப்பட்டால், சம்பந்தப்பட்ட சந்தேக நபருக்கு ஆயுள் தண்டனையும் குறைந்தபட்சம் ஆறு பிரம்படிகளும் விதிக்கப்படலாம்” என்று அவர் கூறினார்.
அதிகாரிகளால் கண்டுபிடிக்கப்படுவதைத் தவிர்ப்பதற்காக, காய்கறி தோட்டத்தை கஞ்சா வளர்க்கும் இடமாக மாற்றுவது சந்தேக நபர்களின் செயல்பாடாகும் என்று அவர் கூறினார்.
