கூவா மூசாங், ஆகஸ்ட் 26:
இங்குள்ள மென்டாரா லாமாவில் வியாழன் அன்று கட்டிடத் தொழிலாளி ஒருவர் தனது முதலாளியால் தலைக் கவசத்தால் அடிக்கப்பட்டதில் உயிரிழந்தார்.
பகாங்கில் உள்ள கோலா லிப்பிஸ் மருத்துவமனையில் மூன்று நாட்கள் சிகிச்சை பெற்று வந்தநிலையில், அந்த நபர் நேற்று உயிரிழந்தார்.
கிளாந்தான் காவல்துறையின் பதில் தலைவர் டத்தோ முகமட் ஜாக்கி ஹருன் கூறுகையில், கடந்த திங்கட்கிழமை நள்ளிரவு 12.30 மணியளவில் பாதிக்கப்பட்டவர் அதே கிராமத்தில் உள்ள ஒரு நண்பரின் வீட்டிற்குச் சென்று, தான் தனது முதலாளியால் தாக்கப்பட்டதாக புகார் கூறினார்.
“காலை 7 மணியளவில், பாதிக்கப்பட்டவரின் நண்பரும் சகோதரருமாகச் சேர்ந்து அவரை சிகிச்சைக்காக மெராபோ ஹெல்த் கிளினிக்கிற்கு அழைத்துச் சென்றனர்.
“பாதிக்கப்பட்டவர் பின்னர் மேலதிக சிகிச்சைக்காக பகாங்கில் உள்ள கோலா லிப்பிஸ் மருத்துவமனைக்கு பரிந்துரைக்கப்பட்டார், ஆனால் வியாழன் காலை 6.30 மணியளவில் மருத்துவமனையில் இறந்தார்,” என்று அவர் வெள்ளிக்கிழமை இன்று வெளியிட்டுள்ள ஒரு அறிக்கையில் தெரிவித்தார்.
விசாரணையின் விளைவாக, பாதிக்கப்பட்டவர் இங்குள்ள மெந்தரா லாமாவில் வீடு கட்டும் தொழிலாளியாக சந்தேக நபருடன் பணிபுரிந்தது கண்டுபிடிக்கப்பட்டது.
“சம்பவத்திற்கான ஆரம்பக் காரணம், பாதிக்கப்பட்டவர் சந்தேக நபரிடம் இருந்து வீடு கட்டும் கூலியை கேட்டதாக கூறப்படுகிறது.
இதனால் “சந்தேக நபர் கோபமடைந்து பாதிக்கப்பட்டவருக்கு காயங்கள் மற்றும் வலி ஏற்படும் வரை ஹெல்மெட்டால் பாதிக்கப்பட்டவரின் தலையில் அடித்தார்,” என்று அவர் கூறினார்.
அதனைத் தொடர்ந்து, 40 வயதுடைய சந்தேக நபர் கைது செய்யப்பட்டு, எதிர்வரும் செவ்வாய்க்கிழமை வரை விளக்கமறியலில் வைக்கப்பட்டுள்ளார்.
“இந்த வழக்கு முதலில் குற்றவியல் சட்டத்தின் பிரிவு 326 இன் படி விசாரிக்கப்பட்டது, பின்னர் பாதிக்கப்பட்டவர் இறந்ததால் தண்டனைச் சட்டத்தின் 302 இன் கீழ் வகைப்படுத்தப்பட்டது,” என்று அவர் கூறினார்.
