பெந்தோங், செப்டம்பர் 1 :
இரண்டு வாரங்களுக்கு முன்பு, 841.06 கிலோகிராம் மெத்தாம்பேட்டமைனைக் கடத்தியதாக, டுரியான் பயிரிடும் விவசாயி ஒருவர் மீது இன்று இங்குள்ள மாவட்ட நீதிமன்றத்தில் குற்றஞ்சாட்டப்பட்டது.
லீ கோக் சூங், 61, என்ற குற்றஞ்சாட்டப்பட்டவர், கடந்த ஆகஸ்ட் 20-ஆம் தேதி அன்று இரவு 9 மணியளவில் இங்குள்ள தாமான் அங்கேரிக்கில் உள்ள ஒரு வீட்டில் இந்தக் குற்றத்தைச் செய்ததாகக் கூறப்படுகிறது.
அவருக்கு எதிரான குற்றச்சாட்டு ஆபத்தான போதைப்பொருள் சட்டம் 1952 இன் பிரிவு 39B (1)(a) இன் கீழ் குற்றம் சாட்டப்பட்டது, இது குற்றம் நிரூபிக்கப்பட்டால் கட்டாய மரண தண்டனையை வழங்குகிறது.
மாவட்ட நிதிமன்ற நீதிபதி காசிரத்துல் ஜன்னா உஸ்மானி உத்மானின் முன்னிலையில் குற்றச்சாட்டு வாசிக்கப்பட்ட பிறகு குற்றம் சாட்டப்பட்டவரிடமிருந்து எந்த மனுவும் பதிவு செய்யப்படவில்லை, ஏனெனில் இந்த வழக்கு உயர்நீதிமன்றத்தின் அதிகார வரம்பிற்கு உட்பட்டது.
குற்றஞ்சாட்டப்பட்டவர் தரப்பில் எந்த வழக்கறிஞரும் ஆஜராகாத நிலையில், வழக்கு விசாரணை அதிகாரி இன்ஸ்பெக்டர் நோர் அசுரா அப்துல் ரஹ்மான் அரசு தரப்பில் ஆஜரானார்.
இரசாயன அறிக்கை நிலுவையில் உள்ள நிலையில், இவ்வழக்கை நவம்பர் 1-ம் தேதிக்கு நீதிமன்றம் ஒத்திவைத்தது.
கடந்த மாதம் RM30.8 மில்லியன் மதிப்புள்ள 841.06 கிலோ சியாபுவை கைப்பற்றிய பின்னர் அனைத்துலக போதைப்பொருள் கடத்தல் மற்றும் உள்ளூர் விநியோக குழுவை போலீசார் வெற்றிகரமாக முறியடித்ததாக ஊடகங்கள் சமீபத்தில் செய்தி வெளியிட்டன.
போதைப்பொருள் ஒரு கிலோ RM36,000 க்கு விற்கப்படுவதாகவும், பறிமுதல் செய்யப்பட்ட போதைப்பொருளை சுமார் 4.2 மில்லியன் போதைப்பித்தர்கள் பயன்படுத்த முடியும் என்றும் கூறப்படுகிறது.
