ஷா ஆலாம், செப்டம்பர் 3 :
Peranti Siswa திட்டத்தின் கீழ் டேப்லெட்க்கு (Tablets) விண்ணப்பிக்கத் தகுதியான மாணவர்கள் செப்டம்பர் 30 ஆம் தேதிக்குள் தங்கள் விண்ணப்பங்களைச் சமர்ப்பிக்க வேண்டும் என்று, உயர்கல்வி அமைச்சர் டத்தோஸ்ரீ டாக்டர் நோரைனி அகமட் தெரிவித்தார்.
உள்கட்டமைப்பு, விரிவுரை அறை உபகரணங்கள் மற்றும் பாடத்திட்டம் ஆகிய துறைகளில் முன்னேற்றம் மூலம் டிஜிட்டல் மயமாக்கல் நிகழ்ச்சி நிரலை வலுப்படுத்த அமைச்சகம் அதன் நிகழ்ச்சி நிரலில் Peranti Siswa திட்டத்தினை முன்னெடுத்துள்ளது என்றார்.
“இவை அனைத்தும் எங்கள் உயர்கல்வி நிறுவனங்களின் நன்மைக்காக சிறந்த மற்றும் நவீன கல்வி சூழலை வழங்குவதாகும்.
“எனவே, Peranti Siswa திட்டத்தின் கீழ் டேப்க்கு (tab) விண்ணப்பிக்காத மாணவர்கள் இந்த வாய்ப்பைப் பயன்படுத்திக் கொள்ளுமாறு கேட்டுக்கொள்கிறேன். விண்ணப்பங்கள் செப்டம்பர் 30, 2022 வரை திறந்திருக்கும்,” என்று யுனிவர்சிட்டி டெக்னாலஜி மாராவில் (UiTM) நடந்த மலேசியக்குடும்பத்தின் (Keluarga Malaysia) கீழ் Peranti Siswa முன்முயற்சியின் தொடக்க விழாவில் அவர் கூறினார்.
நாடு முழுவதும் உள்ள 600க்கும் மேற்பட்ட உயர்கல்வி நிறுவனங்களில் உள்ள 1.6 மில்லியன் மாணவர்கள் பயன்பெறும் வகையில் இந்த முயற்சி விரிவுபடுத்தப்படும் என்று அவர் நம்புவதாகவும், உயர்கல்வி அமைச்சகத்தின் நீண்ட கால திட்டத்தில் தேசிய உயர்கல்வி டிஜிட்டல் மயமாக்கல் திட்டத்தின் கீழ் சாதனங்கள் மற்றும் இணையத்தை அணுகுவதில் முக்கிய கவனம் செலுத்தப்படுவதாகவும் நோரைனி கூறினார்.
“தொற்றுநோயின் போது, 10,000 க்கும் மேற்பட்ட மடிக்கணினிகள் மாணவர்களுக்கு விநியோகிக்கப்பட்டன.
“2020/2021 கல்வி அமர்விற்கான தரவுத் திட்ட உதவியின் கீழ் புதிய 76,153 மாணவர்களுக்கு RM50 ஒருமுறை செலுத்துவதற்காக சுமார் RM3.8 மில்லியன் செலவிடப்பட்டது,” என்று அவர் மேலும் கூறினார்.
இதற்கிடையில், சேதமடைந்த மடிக்கணினிகளை மாற்ற முடியும் என்று தகவல் தொடர்பு மற்றும் மல்டிமீடியா அமைச்சர் டான்ஸ்ரீ அன்னுார் மூசா கூறினார்.
வெள்ளம் அல்லது தீ விபத்தில் சேதமடைந்தால், கவலைப்பட வேண்டாம், புதிய சாதனம் உங்களுக்கு வழங்கப்படும், ”என்று அவர் மேலும் கூறினார்.
ஆகஸ்ட் 4 அன்று, நாடாளுமன்றத்தில் ஆண்டுதோறும் பி40 மாணவர்களுக்கான Peranti Siswa திட்டத்தின் கீழ் டேப்களை வழங்குவதற்கு நான்கு வகை கல்வி நிலைகளுக்கு விரிவுபடுத்தப்பட்டுள்ளதாகக் கூறப்பட்டது – கல்வி அமைச்சின் மெட்ரிகுலேஷன் திட்டங்கள், பொதுப் பல்கலைக்கழகங்களில் அடித்தளப் படிப்புகள், படிவம் ஆறு மாணவர்கள் (முதல் மற்றும் இரண்டாவது செமஸ்டர்கள்) , மற்றும் தொழிற்கல்லூரிகளில் டிப்ளமோ மாணவர்கள் என்ற நான்கு தரப்பு மாணவர்களுக்கும் இது விரிவுபடுத்தப்பட்டுள்ளது.
முன்னதாக, பொது மற்றும் தனியார் உயர்கல்வி நிறுவனங்களில் சேரும் மாணவர்கள் மட்டுமே டேப்லெட் (Tablet) சாதனத்திற்கு விண்ணப்பிக்க அனுமதிக்கப்பட்டனர் என்பது குறிப்பிடத்தக்கது.
