சிங்கப்பூர், செப்டம்பர் 5:
எண் 470, அப்பர் பாய லேபாரில் புதிதாகத் திறக்கப்பட்டுள்ள கடையில், குடைகள், பைகள், காலணிகள், தண்ணீர் பாட்டில்கள், காற்றாடிகள், மெத்தைகள் போன்றவற்றை வெளிநாட்டு ஊழியர்கள் இனி இலவசமா கப் பெற்றுக்கொள்ள முடியும்.
‘இட்ஸ்ரெய்னிங்ரெய்ன்கோட்ஸ்’ (ItsRainingRaincoats) அமைப்பு, ‘இன்ஸ்பையர்’ (InspIRRe) எனும் அந்தக் கடையைத் தொடங்கியுள்ளது. பொதுமக்கள் நன்கொடையாக அளிக்கும் பொருள்கள் அந்தக் கடையில் வைக்கப்படும்.
இந்தக் கடை கட்டடத்தின் கீழ்த்தளத்தில் செயல்படும். மேல்தளத்தில் ‘இட்ஸ்ரெய்னிங்ரெய்ன்கோட்ஸ்’ (ஐஆர்ஆர்) அமைப்பின் தொண்டூழியர்கள் பணியாற்றவும் வெளிநாட்டு ஊழியர்கள் இளைப்பாறவும் இடவசதியைக் கொண்டிருக்கும்.
‘இன்ஸ்பையர்’ கடையில் வெளிநாட்டு ஊழியர்கள், மாணவர்களுடன் வர்த்தகங்கள், கல்வி நிலையங்கள் ஆகியவற்றுக்கான நிகழ்ச்சிகளும் நடத்தப்படும். குளிரூட்டப்பட்ட இந்த அறையில், இலவச இணைய இணைப்பும் உண்டு.
ஓய்வுநாட்களில் நண்பர்களைச் சந்திக்கவும் உட்கார்ந்து பேசவும், படிக்கவும் தனிப்பட்ட இடத்தை நாடும் ஊழியர்களும் இந்த அறையைப் பயன்படுத்தலாம் என்றார் ‘ஐஆர்ஆர்’ அமைப்பின் நிறுவனர் தீபா ஸ்வாமி நாதன்.
இரண்டு மணி நேரத்திற்கு இருபது ஊழியர்களே கடையில் இருக்க முடியும் என்பதால், கடைக்கு வரும்முன், அமைப்பின் செயலியில் அவர்கள் முன் பதிவு செய்ய வேண்டும்.
கடையை நேற்றுமுன்தினம் திறந்துவைத்த தற்காப்பு, மனிதவள அமைச்சுகளுக்கான மூத்த துணை அமைச்சர் ஜாக்கி முகமட் கூறும்போது, ” லாப நோக்கமற்ற அமைப்பான ‘ஐஆர்ஆர்’ இதில் திறம்படச் செயலாற்றி வருகிறது என்றும் இந்த அமைப்பு மேலும் பல நடவடிக்கைளை மேற்கொள்ள அரசாங்கம் ஆதரவு அளிக்கும்” என்றும் தெரிவித்தார்.
சிங்கப்பூர் சமூகத்தின் அங்கத்தினரான வெளிநாட்டு ஊழியர் களுக்கு வசதியான சூழலை உருவாக்கித் தர நாம் கடமைப்பட்டுள்ளோம் என்று அவர் கூறினார்.
“சிங்கப்பூர் சமூகத்தின் அங்கத்தினரான வெளிநாட்டு ஊழியர்களை மக்கள் வேறுபடுத்திப் பார்க்கக்கூடாது. அதேபோல வெளிநாட்டு ஊழியர்களும் சிங்கப்பூரைத் தங்கள் தாய்நாடு போலக் கருத வேண்டும்,” என்று திரு ஜாக்கி வலியுறுத்தினார்.
‘ஸ்பேஸ் மேட்ரிக்ஸ்’ எனப்படும் வடிவமைப்பு நிறுவனம், கட்டணம் பெறாமல் கடையின் புதுப்பிப்புப் பணிகளைச் செய்து கொடுத்துள்ளது. பொதுமக்களும் நிறுவனங்களும் நன்கொடையாக வழங்கிய பொருள்களை கொண்டு அவ்விடம் அலங்கரிக்கப்பட்டுள்ளது.
“நமக்கு உதவுபவர்களுக்கு நாமும் கைமாறு செய்ய வேண்டும். உதவி தேவைப்படும் ஊழியர்களுக்கு உதவுவதில் மனநிறைவும் கிடைக்கிறது. ஊழியர்கள் தங்கள் நேரத்தை இத்தகைய தொண்டூழியப் பணிகளில் செலவழிக்கலாம்,” என்றார் ஒரு தொண்டூழியர் .
பொருள்களை நன்கொடையாக அளிக்க விரும்புவோர் ‘இட்ஸ்ரெய்னிங்ரெய்ன்கோட்ஸ்’ அமைப்பை நேரடியாகத் தொடர்பு கொள்ளலாம்.
