டுங்கூன், அக்டோபர் 7 :
புக்கிட் பேசி அருகேயுள்ள இரும்புத் தாது சுரங்கத்தில், நேற்று மாலை புல்டோசர் மோதியதில், மெக்கானிக் ஒருவர் இறந்தார்.
மாலை 6 மணியளவில் நடந்த இந்தச் சம்பவத்தில், சிரம்பான், ஃபிளாசம் பார்க் பகுதியைச் சேர்ந்த 63 வயதான காங் ஹான் மெங், என்பவரே சம்பவ இடத்திலேயே உயிரிழந்தார் என்று டுங்கூன் மாவட்ட காவல்துறைத் தலைமைக் கண்காணிப்பாளர் பஹாருடின் அப்துல்லா தெரிவித்தார்.
அவரது கூற்றுப்படி, சம்பவத்திற்கு முன்னர், பாதிக்கப்பட்டவர் புல்டோசரை பழுதுபார்த்ததாகக் கூறப்படுகிறது.
“சம்பவத்தின் போது, பாதிக்கப்பட்டவர் சம்பந்தப்பட்ட இயந்திரத்தின் சங்கிலியில் நின்று கொண்டிருந்ததாகக் கூறப்படுகிறது.
இயந்திரத்தின் இன்ஜினை ஸ்டார்ட் செய்ய முயன்றபோது, அதில் சிக்கியிருந்த செயின் திடீரென நகர்ந்ததால் பாதிக்கப்பட்டவர் தரையில் விழுந்தார். பின் இயந்திரம் நகர்ந்து பாதிக்கப்பட்டவரை நசுக்கியாதாக பஹாருடின் கூறினார்.
“பாதிக்கப்பட்டவரின் உடலில் பலத்த காயம் ஏற்பட்டது, இதனால் அவர் சம்பவ இடத்திலேயே இறந்தது உறுதி செய்யப்பட்டது.
“சம்பவம் தொடர்பில் அறிக்கையைப் பெற்ற போலீசார் சம்பவம் நடந்த இடத்திற்கு விரைந்தனர், மேலும் பாதிக்கப்பட்டவரின் உடல் மேலதிக விசாரணைக்காக டுங்கூன் மருத்துவமனை தடயவியல் பிரிவிற்கு அனுப்பப்பட்டது” என்று அவர் கூறினார்.
மேலும் சாலைப் போக்குவரத்துச் சட்டம் 1987ன் பிரிவு 41 (1)ன் படி இந்த வழக்கு விசாரிக்கப்பட்டது என்றார்.
