சிரம்பான் 2, கார்டன் ஹோம்ஸில் நேற்று இரவு ஒருவர் காரில் இறந்து கிடக்க கண்டெடுக்கப்பட்டார்.
நேற்று இரவு 7.30 மணியளவில் நடந்த சம்பவத்தில், வாகன நிறுத்துமிடத்தில் தனது 43 வயது நண்பனின் கார் இருப்பதைப் பார்த்த உயிரிழந்தவரின் நண்பர், காரை நெருங்கி, அதனுள் பார்த்தபோது, பலியானவரின் உடல் ஓட்டுநர் இருக்கையில் உடல் வீங்கிய நிலையில் இருப்பதைக் கண்டார்.
குறித்த கார் சூப்பர் மார்க்கெட் முன்னுள்ள கார் நிறுத்துமிடத்தில் இருந்ததாகவும், காரின் இன்ஜின் இயங்குவதை பார்த்ததாகவும் பாதிக்கப்பட்டவரின் நண்பரும் புகார்தாரருமான ஆடவர் கூறியதாக, சிரம்பான் மாவட்ட காவல்துறை தலைவர், துணை ஆணையர் நந்தா மரோஃப் கூறினார்.
அவரின் நண்பரின் கூற்றுப்படி, பாதிக்கப்பட்டவர் ஓட்டுநர் இருக்கையில் சுயநினைவின்றி இருப்பதைக் கண்டதாகவும், பாதிக்கப்பட்டவரின் முகமும் வீங்கியிருந்ததாகவும், மூக்கு மற்றும் வாயிலிருந்து திரவம் வெளியேறியதாகவும் அவர் கூறினார்.
“புகார்தாரர் காரின் கதவைத் திறக்க முயன்றார், ஆனால் அது பூட்டப்பட்டு இருந்ததால், கார் ஜன்னலில் தட்டினார், ஆனாலும் பாதிக்கப்பட்டவரிடமிருந்து எந்த பதிலும் கிடைக்காததை தொடர்ந்து, அவர் உதவி கேட்டு MERS 999 ஐ அழைத்தார்,” என்று அவர் கூறினார்.
இறந்தவரின் அடையாளத்தை காவல்துறை அடையாளம் கண்டுள்ளதாகவும், ஆரம்ப விசாரணையின் அடிப்படையில், சம்பவம் நடந்த இடத்தில் குற்றவியல் கூறு எதுவும் கண்டறியப்படவில்லை என்றும் அவர் கூறினார்.
புகார்தாரர் கொடுத்த தகவலின் பேரில், சம்பவ இடத்துக்குச் சென்ற தீயணைப்புத் துறையினர், சிறப்பு உபகரணங்கள் மூலம் காரின் ஓட்டுநர் பக்க கதவைத் திறந்தனர், அதனைத் தொடர்ந்து மேற்கொண்ட பரிசோதனையில் இறந்தவர் கண்டுபிடிக்கப்படுவதற்கு இரண்டு அல்லது மூன்று நாட்களுக்கு முன்பு அவர் இறந்துவிட்டார் என்பதை, அங்கிருந்த சுகாதார உதவியாளர் உறுதிப்படுத்தியதாகவும் அவர் கூறினார்.
சம்பவம் தொடர்பில் மேலதிக விசாரணைகளை போலீஸ் தரப்பு முன்னெடுத்துள்ளதாக நந்தா மேலும் கூறினார்.
