நேற்று ஞாயிற்றுக்கிழமை (ஏப்ரல் 9) இரவு ஜாலான் பாயா தெருபோங்கில் உள்ள கம்போங் பிசாங்கில் இரண்டு வீடுகள் தீப்பிடித்து எரிந்ததில், ஏழு வயது சிறுமி உடல் கருகி உயிரிழந்தார்.
இந்த பயங்கர தீ விபத்தில் பலியானவர் ஜி. ஸ்ரீ லாவண்யா என்று அடையாளம் காணப்பட்டார் என்றும், உயிரிழந்தவரின் பாட்டிக்கு கைகளில் தீக்காயங்கள் ஏற்பட்டதாகவும், ஆனால் அவரது உடல் நிலை தற்போது சீராக இருப்பதாகவும் பாயா தெருபோங் தீயணைப்பு மற்றும் மீட்புத் துறையின் செயல்பாட்டுத் தளபதி, முகமட் ஷகிர் அப்துல்லா கூறினார்.
குறித்த சம்பவம் தொடர்பில் தமது துறைக்கு இரவு 11.19 மணிக்கு அவசர அழைப்பு வந்தது, அதனைத் தொடர்ந்து ஐந்து நிமிடங்களுக்குப் பிறகு முதல் தீயணைப்பு இயந்திரம் சம்பவ இடத்திற்குச் சென்றது.
“அந்த இடத்திற்கு தீயணைப்பு வீரர்கள் வந்தபோது, ஒவ்வொன்றும் 464 சதுர மீட்டர் அளவுள்ள இரண்டு வீடுகள் தீப்பிடித்து எரிந்தன. ஒரு வீட்டில் ஒரு பெண் சிக்கியிருப்பதாக அவர்களிடம் கூறப்பட்டது.
“தீயைக் கட்டுக்குள் கொண்டு வந்த பிறகு, தீயணைப்பு வீரர்கள் வளாகத்தைச் சரிபார்த்தனர், அங்குள்ள முதல் வீட்டின் படுக்கையறையில் சிறுமியின் எரிந்த உடற்பாகங்களைக் கண்டனர்,” என்று அவர் கூறினார்.
சிறுமியின் உடல் பிரேத பரிசோதனைக்காக பினாங்கு மருத்துவமனைக்கு அனுப்பப்பட்டுள்ளதாகவும், தீ விபத்துக்கான காரணம் இன்னும் கண்டறியப்படவில்லை என்றும் அவர் கூறினார்.
