இந்திய அணி வேகப்பந்து வீச்சாளர் ஹர்ஷித் ராணாவின், வளர்ச்சி வியக்க வைக்கும் வகையில் இருக்கிறது.
2022ஆம் ஆண்டில், குஜராத் டைடன்ஸ் அணியின் நெட் பௌலராக ஹர்ஷித் ராணா இருந்தார். அதன்பிறகு, 2024ஆம் ஆண்டில் கொல்கத்தா நைட் ரைடர்ஸ் அணிக்கு சென்ற அவர், அந்த சீசனில் கோப்பை வெல்ல மிகமுக்கிய காரணமாக திகழ்ந்தார். வேகத்திற்கு சாதகமில்லாத பிட்சில் கூட, அபாரமான முறையில் பவுன்சர் வீசுவது, இன் ஸ்விங் வீசுவது போன்ற விஷயங்களில் கில்லியாக இருந்ததால், உடனே இந்திய அணிக்கு தேர்வு செய்யப்பட்டார்.
குறிப்பாக, 10 முதல்தர போட்டிகளில் மட்டுமே விளையாடிய அவரை, ஆஸ்திரேலிய அணிக்கு எதிரான 5 போட்டிகள் கொண்ட டெஸ்ட் தொடருக்கு தேர்வு செய்தனர். இது கடும் விமர்சனத்தை பெற்ற நிலையில், முதல் டெஸ்டில் பிளேயிங் 11-ல் இடம்பெற்று, தொடர்ந்து மிரட்டலாக பந்துவீசினார். அவரது பவுன்ஸ், அவரது இன் ஸ்விங் பந்துகளை தாக்குப்பிடிக்க முடியாமல், ஆஸ்திரேலிய பேட்டர்கள் தடுமாறினர். மொத்தம், 4 விக்கெட்களை கைப்பற்றி அசத்தினார்.
இந்நிலையில், ஹர்ஷித் ராணாவின் வளர்த்து குறித்து, 19 வயதுக்கு உட்பட்டோருக்கான அணியில் இருந்தே ராணாவின் பயிற்சியாளராக இருக்கும் என் எஸ் நெகி, நெகிழ்ச்சியுடன் பேசியுள்ளார். அதில், ‘‘ஹர்ஷித் ராணாவிடம் அபாரமான திறமை இருக்கிறது. கடைசியாக அவர் ரஞ்சிக் கோப்பையில் விளையாடியபோது, இரண்டு சீசன்களிலும் சிறப்பாக பந்துவீசினார். இது ராணாவின் துவக்கம் தான். ராணாவால் 70-80 டெஸ்ட் போட்டிகளுக்கு மேல் விளையாட முடியும். மூன்றுவிதமான இந்திய அணியிலும், ராணாவால் சிறப்பாக பந்துவீச முடியும்’’ எனக் கூறினார்.
