கோலாலம்பூர்:
சரவாக் மாநிலத்தில் நிலவி வரும் அடர்ந்த புகைமூட்டம் காரணமாகச் செரியான் மற்றும் சமரஹான் ஆகிய இரண்டு பகுதிகளில் காற்றுத் தரக் குறியீடு (IPU) இன்று காலை 9.00 மணி நிலவரப்படி அபாயகரமான கட்டத்தை எட்டியுள்ளது.
செரியான் பகுதியில் அதிகபட்சமாக 374 API ஆகவும், சமரஹானில் 306 API ஆகவும் காற்றுத் தரக் குறியீடு பதிவாகியுள்ளது என்றும், கூச்சிங் (295) மற்றும் ஸ்ரீ அமான் (214) ஆகிய பகுதிகள் “மிகவும் ஆரோக்கியமற்ற” நிலையில் உள்ளன என்றும் சுற்றுச்சூழல் துறை (JAS) துணை தலைமை இயக்குநர் அஸூரி அஸீஸா சாய்டன் தெரிவித்தார்.
இவை தவிர, நாட்டின் மேலும் 13 பகுதிகள் ஆரோக்கியமற்ற காற்றுத் தரத்தைப் பதிவு செய்துள்ளன. அவற்றில் பத்து மூடா, செராஸ், ஜோஹான் செத்தியா, தஞ்சோங் மாலிம் மற்றும் தைப்பிங் ஆகிய பகுதிகள் குறிப்பிடத்தக்கவை.
ஆசியான் பிராந்தியத்தில் ஏற்பட்டுள்ள வறண்ட வானிலை மற்றும் தீ வேகமாக பற்றக்கூடிய இடங்களின் (Hotspots) எண்ணிக்கை அதிகரித்ததே இதற்குக் காரணமாகும்.
சிங்கப்பூரைத் தளமாகக் கொண்ட ‘ஆசியான் சிறப்பு வானிலை மையத்தின்’ (ASMC) அறிக்கையின்படி, இந்தோனேசியாவின் கலிமந்தானில் 1,180 தீ வேகமாக பற்றக்கூடிய இடங்களும், சுமத்திராவில் 18 தீ வேகமாக பற்றக்கூடிய இடங்களும் கண்டறியப்பட்டுள்ளன.
மலேசியாவைப் பொறுத்தவரை மொத்தம் 13 தீ வேகமாக பற்றக்கூடிய இடங்கள் கண்டறியப்பட்டுள்ளன (சரவாக்கில் 9, பேராக்கில் 2, சபாவில் 2).
மேற்கு கலிமந்தானில் இருந்து உருவாகும் அடர்ந்த புகைமூட்டம் காற்று வீசும் திசையை நோக்கி நகர்ந்து, மேற்கு சரவாக் எல்லைப் பகுதிக்குள் ஊடுருவி வருவதாகச் சுற்றுச்சூழல் துறை தெரிவித்துள்ளது.
