கோலாலம்பூர், TuJu நெடுஞ்சாலை வழிசெலுத்தல் செயலியின் தொழில்நுட்பக் குழு, தற்போது மீட்பு, மேம்பாட்டுப் பணிகளை மேற்கொண்டு வருகிறது. இப்பணிகளை அதிகபட்சமாக நவம்பர் 6ஆம் தேதிக்குள் முடிக்க இலக்கு நிர்ணயிக்கப்பட்டுள்ளது. மீட்புப் பணிகள் குறித்த தகவல்கள் TuJu-வின் அதிகாரப்பூர்வ வழிகள் மூலம் தெரிவிக்கப்படும் என்றும், செயலியின் மற்ற செயல்பாடுகளை இப்போதைக்கு வழக்கம் போல் தொடர்ந்து பயன்படுத்தலாம் என்றும் TuJu நிர்வாகம் ஓர் அறிக்கையில் தெரிவித்துள்ளது.
இது தொடர்பாக, கடந்த சில நாட்களாக வழிசெலுத்தல் செயல்பாடுகளில் இடையூறுகளைச் சந்தித்த பயனர்களிடம் TuJu வருத்தம் தெரிவிக்கிறது. அவர்களின் சிரமங்களை நாங்கள் தீவிரமாக எடுத்துக்கொள்கிறோம், மேலும் எங்கள் சேவை குறித்த பயனர்களின் கருத்துக்களையும் விமர்சனங்களையும் நாங்கள் பாராட்டுகிறோம். வழிசெலுத்தல் செயல்பாடு மீண்டும் நிலையாகவும் சீராகவும் செயல்படுவதையும், பயனர்களின் பயணத் தேவைகளைப் பூர்த்தி செய்வதையும் உறுதி செய்வதே எங்கள் முன்னுரிமையாகும் என்று அந்த அறிக்கை நேற்று தெரிவித்தது.
மேலும், பயனர்களின் பொறுமைக்கும் ஆதரவிற்கும் TuJu நன்றியுள்ளதாக இருப்பதாகவும், ஒவ்வொரு புகாரும் கருத்தும் சிக்கல்களைக் கண்டறிந்து தேவையான மேம்பாடுகளைச் செயல்படுத்த உதவுவதாகவும் அந்த அறிக்கை கூறியது. மலேசியக் குடிமக்களின் தரவுகளின் பாதுகாப்பிற்கு முன்னுரிமை அளித்து, TuJu சிறந்த வழிசெலுத்தல் பயன்பாடுகளில் ஒன்றாக மாறுவதற்காக, பயனர்களின் எதிர்பார்ப்புகளைப் பூர்த்தி செய்ய நாங்கள் தொடர்ந்து முயற்சிப்போம் என்று அந்த அறிக்கை குறிப்பிட்டது.
மலேசிய நெடுஞ்சாலை ஆணையத்தால் உருவாக்கப்பட்ட TuJu-வை, சாலை வழிசெலுத்தல் தேவைகளுக்கான ஒரு மாற்றாகப் பயன்படுத்துமாறு பிரதமர் டத்தோஶ்ரீ அன்வார் இப்ராஹிம் பொதுமக்களை ஊக்குவித்ததாகத் தெரிவிக்கப்பட்டது. இஸ்ரேலிய அரசாங்கத்தின் சட்டங்களுக்குக் கட்டுப்பட்ட வேஸ் பயன்பாட்டைப் பயன்படுத்துவதால், மக்களின் தகவல் பாதுகாப்பு, பயணத் தரவுகளுக்கு ஏற்படும் அபாயத்தைத் தொடர்ந்து இந்த மாற்று நடவடிக்கை முன்மொழியப்பட்டது.
