RM50 இலட்சம் வரி விவகாரம்! முக்ரிஸ் மகாதீரின் மனுவைத் தள்ளுபடி செய்த உயர்நீதிமன்றம்!

கோலாலம்பூர்,

RM50 இலட்சத்திற்கும் அதிகமான கூடுதல் வரி விதிப்பை எதிர்த்து, முன்னாள் கெடா மந்திரி பெசார் டத்தோ ஸ்ரீ முக்ரிஸ் மகாதீர் தாக்கல் செய்த நீதித்துறை மறுஆய்வு மனுவை கோலாலம்பூர் உயர்நீதிமன்றம் இன்று தள்ளுபடி செய்துள்ளது.

2017 முதல் 2019ஆம் ஆண்டு வரையிலான வரி மதிப்பீட்டு ஆண்டுகளுக்காக உள்நாட்டு வருவாய் வாரியம் (LHDN) விதித்த RM5,020,707.18 கூடுதல் வரித் தொகையை எதிர்த்து முக்ரிஸ் இந்த மனுவைத் தாக்கல் செய்திருந்தார்.

இந்த வழக்கை விசாரித்த நீதிபதி டத்தோ அஸிஸான் முகமது அர்ஷாட், வரி விதிப்பு தொடர்பான சர்ச்சைகள் முதலில் வருமான வரி சிறப்பு ஆணையர்களிடம் (SCIT) முறையீடு செய்யப்பட்டுத் தீர்மானிக்கப்பட வேண்டும் எனத் தெரிவித்தார்.

1967ஆம் ஆண்டு வருமான வரிச் சட்டத்தின் கீழ் ஏற்கெனவே முறையீட்டு நடைமுறைகள் உள்ள நிலையில், அவற்றைத் தவிர்த்து நேரடியாக நீதித்துறை மறுஆய்வை நாடுவதற்கான விதிவிலக்கான சூழ்நிலைகள் எதுவும் நிரூபிக்கப்படவில்லை என நீதிபதி சுட்டிக்காட்டினார்.

மேலும், முக்ரிஸ் ஏற்கெனவே வருமான வரிச் சட்டத்தின் 99ஆவது பிரிவின் கீழ் சிறப்பு ஆணையர்களிடம் மேல்முறையீடு செய்திருப்பதையும் நீதிமன்றம் கவனத்தில் எடுத்துக்கொண்டது.

இதனால், சட்டப்படி ஏற்படுத்தப்பட்ட நடைமுறைகளைத் தவிர்க்கும் முயற்சியாக இந்த மனு அமைந்துள்ளதாகக் கூறி, அதனை நீதிமன்ற நடைமுறையின் தவறான பயன்பாடு என நீதிபதி தீர்மானித்தார்.

அத்துடன், பிஜுவாங் கட்சியின் தலைவரான முக்ரிஸ், உள்நாட்டு வருவாய் வாரியத்திற்கு RM5,000 வழக்குச் செலவாகச் செலுத்த வேண்டும் எனவும் நீதிமன்றம் உத்தரவிட்டுள்ளது.

முன்னதாக, கூடுதல் வரி மதிப்பீட்டு அறிவிப்புகள் சட்டவிரோதமானவை மற்றும் நியாயமற்றவை எனக் கூறிய முக்ரிஸ், அவற்றை ரத்து செய்யுமாறும், வருமான வரிச் சட்டத்தின் 113(2) பிரிவின் கீழ் விதிக்கப்பட்ட அபராதம் செல்லாது என அறிவிக்குமாறும் கோரியிருந்தார்.

இந்த வழக்கில் ஆரம்பத்தில் பிரதமர் டத்தோ ஸ்ரீ அன்வார் இப்ராஹிம் மற்றும் மலேசிய அரசாங்கமும் எதிர்மனுதாரர்களாகச் சேர்க்கப்பட்டிருந்தனர். எனினும், கடந்த 2025 ஜூலை 24ஆம் தேதி அவர்கள் வழக்கிலிருந்து நீக்கப்பட்டதால், உள்நாட்டு வருவாய் வாரியத்தின் தலைமை இயக்குநர் மட்டுமே எதிர்மனுதாரராக இருந்தார்.

குறிப்பாக, இன்றைய தீர்ப்பு கூடுதல் வரித் தொகை சரியானதா என்பதை இறுதியாகத் தீர்மானிக்கவில்லை. வரி தொடர்பான சர்ச்சையை உரிய சட்டப்பூர்வ முறையீட்டு நடைமுறையின் மூலம் தீர்க்க வேண்டும் என்பதையே நீதிமன்றம் வலியுறுத்தியுள்ளது.

LEAVE A REPLY

Please enter your comment!
Please enter your name here