மலாக்கா, பாடாங் தெமுவில் உள்ள ஒரு குழந்தை பராமரிப்பு மையத்தில் நேற்று மாலை ஆறு மாத ஆண் குழந்தை மூச்சுத் திணறல் காரணமாக இறந்ததாக நம்பப்படுகிறது. மற்றொரு ஊழியருடன் சுழற்சி முறையில் கடமைகளைச் செய்து கொண்டிருந்த பராமரிப்பாளர், நீல நிற முகத்துடன் முகம் குப்புறக் கிடப்பதைக் கண்டதாக உத்துசான் மலேசியா தெரிவித்துள்ளது. குழந்தை உடனடியாக அருகிலிருந்த மருத்துவமனைக்கு அழைத்து செல்லப்பட்டு அங்கு ஒரு மருத்துவக் குழு குழந்தையை ஆம்புலன்ஸில் மலாக்கா மருத்துவமனைக்கு அனுப்புவதற்கு முன்பு 30 நிமிடங்கள் CPR சிகிச்சை அளித்தனர்
மருத்துவமனையின் சிவப்பு மண்டலத்தை அடைந்தவுடன், குழந்தைக்கு மீண்டும் CPR உதவி வழங்கப்பட்டது. ஆனால் இறந்துவிட்டதாக உறுதி செய்யப்பட்டது என்று போர்டல் ஒரு ஆதாரத்தை மேற்கோள் காட்டி கூறியது. குழந்தையின் உடலைப் பரிசோதித்ததில் எந்தத் தவறும் இல்லை என்றும், அதன் பிறகு மருத்துவமனை விரைவில் காவல் நிலையத்தில் புகார் அளித்ததாகவும் அந்த வட்டாரம் தெரிவித்துள்ளது. மலாக்கா தெங்கா காவல்துறைத் தலைவர் கிறிஸ்டோபர் பாடிட் இந்த அறிக்கையை உறுதிப்படுத்தினார். மேலும் இது குழந்தைப் பராமரிப்பில் அலட்சியமாக இருந்ததற்காக 2001 குழந்தைகள் சட்டத்தின் பிரிவு 31(1)(a) இன் கீழ் விசாரிக்கப்படுவதாகவும் கூறினார்.
அதே நாளில், மையத்தில் இருந்த மற்றொரு மூன்று வயது சிறுமியின் இடது காதில் ஒரு பராமரிப்பாளர் அடித்ததால் காயம் ஏற்பட்டதாக கோஸ்மோ பின்னர் தெரிவித்தார். குழந்தையின் தாயார் நூருல் ஷஃபிகா தாவூத், மாலை 5.30 மணிக்கு தனது மகள் ஃபாய்கா தலிலா ஃபரிஸ் டேனியலை அழைத்துச் சென்றதாகக் கூறினார். மேலும் குழந்தை தனது இடது காதில் வலி இருப்பதாக புகார் அளித்தார்.
வலி காரணமாக இரவு முழுவதும் அவள் அழுதாள். இரவு 11 மணிக்கு நான் அவளை மருத்துவமனைக்கு அழைத்து வந்தேன். அவளுடைய இடது காது காயமடைந்து வீங்கியிருப்பதை மருத்துவர் உறுதிப்படுத்தினார். பின்னர் நாங்கள் மலாக்கா மருத்துவமனைக்குச் சென்று போலீசில் புகார் அளித்தோம் என்று அவர் இன்று செய்தியாளர்களிடம் கூறினார்.
