தவாவ்: தாமான் பெர்வீராவில் உள்ள மழைக்காட்டு நீர்வீழ்ச்சியில் நேற்று மாலை குளித்துக்கொண்டிருந்தபோது 14 வயது சிறுவன் நீரில் மூழ்கிய நிலையில் கண்டெடுக்கப்பட்டான். மாலை 4.30 மணியளவில் நடந்த இந்தச் சம்பவத்தில், முகமது ஐமன் ஷாஹ்ரிசாத் என அடையாளம் காணப்பட்ட அந்தச் சிறுவன், நீர்வீழ்ச்சிப் பகுதியில் தனது 13 நண்பர்களுடன் குளித்துக்கொண்டிருந்ததாக நம்பப்படுகிறது.
தவாவ் தீயணைப்பு மற்றும் மீட்பு நிலையத்தின் (BBP) தலைவர் ஜெமிஷின் உஜின், மாலை 4.45 மணிக்குத் தமக்கு அவசர அழைப்பு வந்ததாகவும், அதைத் தொடர்ந்து தவாவ் மண்டல நீர் மீட்புக் குழுவின் (PPDA) ஐந்து உறுப்பினர்கள் சம்பவ இடத்திற்கு அனுப்பப்பட்டதாகவும் கூறினார்.
சம்பவம் நடந்த இடம் நிலையத்திலிருந்து சுமார் 21 கிலோமீட்டர் தொலைவில் உள்ளது. மேலும், நீர்வீழ்ச்சிப் பகுதியில் தகவல் தொடர்பு வசதி குறைவாக இருப்பதால் மீட்புப் பணிகளிலும் சிரமங்கள் நிலவுகின்றன.சில நிமிடங்களுக்குப் பிறகு, தீயணைப்புப் படையினர் சம்பவ இடத்திற்கு வருவதற்கு முன்பே, பொதுமக்களாலும் கிராமவாசிகளாலும் அந்தச் சிறுவன் கண்டெடுக்கப்பட்டதாக நம்பப்படுகிறது.
அருவிப் பகுதியில் குளிக்கும்போது பாதிக்கப்பட்டவர் நன்றாக நீந்தத் தெரியாதவர் என்று ஆரம்பகட்ட தகவல்கள் தெரிவிக்கின்றன என்று அவரைத் தொடர்புகொண்டபோது கூறினார்.பின்னர், மலேசிய சுகாதார அமைச்சகத்தின் (MOH) குழுவினர் மாலை 6.38 மணிக்கு பாதிக்கப்பட்டவர் இறந்துவிட்டதை உறுதிப்படுத்தியதாக ஜெமிஷின் கூறினார். அதன்பிறகு, பாதிக்கப்பட்டவரின் உடல் மேலதிக நடவடிக்கைக்காக காவல்துறையிடம் ஒப்படைக்கப்பட்டதாகவும், இரவு 7.05 மணிக்கு மீட்புப் பணி முழுமையாக நிறைவடைந்ததாகவும் அவர் தெரிவித்தார்.
