புதுடெல்லி,
சர்வதேச சதுரங்க அரங்கில் இந்தியா புதிய வரலாற்றுச் சாதனையைப் படைத்துள்ளது. மத்தியப் பிரதேசத்தைச் சேர்ந்த 22 வயதான இளம் வீரர் அனுஜ் ஸ்ரீவத்ரி (Anuj Shrivatri), இந்தியாவின் 100ஆவது கிராண்ட்மாஸ்டர் என்ற பெருமையைப் பெற்றுள்ளார்.
7ஆவது ஆசியான் பிளஸ் ஓபன் செஸ் சாம்பியன்ஷிப் போட்டியில் சிறப்பான ஆட்டத்தை வெளிப்படுத்தி சாம்பியன் பட்டத்தை வென்றதன் மூலம், கிராண்ட்மாஸ்டர் அந்தஸ்திற்குத் தேவையான தகுதிகளைப் பூர்த்தி செய்து இந்த வரலாற்று மைல்கல்லை எட்டியுள்ளார்.
இந்திய சதுரங்க வரலாற்றில் 1988ஆம் ஆண்டு தமிழகத்தைச் சேர்ந்த விஸ்வநாதன் ஆனந்த், நாட்டின் முதல் கிராண்ட்மாஸ்டராக உருவெடுத்தார். அவர் தொடங்கிவைத்த இந்தச் சாதனைப் பயணம், 38 ஆண்டுகளுக்குப் பின்னர் 100 கிராண்ட்மாஸ்டர்கள் என்ற புதிய உச்சத்தை எட்டியுள்ளது. 
சுமார் 15 ஆண்டுகளுக்கு முன்பு இந்தியாவில் கிராண்ட்மாஸ்டர்களின் எண்ணிக்கை 30 என்ற அளவிலேயே இருந்த நிலையில், தற்போது அந்த எண்ணிக்கை 100ஆக உயர்ந்துள்ளது. குறிப்பாக, கடந்த சில ஆண்டுகளில் இந்திய இளம் வீரர்கள் சர்வதேசப் போட்டிகளில் தொடர்ந்து சாதனைகளைப் படைத்து வருவது குறிப்பிடத்தக்கது.
இந்த வரலாற்றுச் சாதனை குறித்து ஐந்து முறை உலக சதுரங்க சாம்பியன் பட்டம் வென்ற விஸ்வநாதன் ஆனந்த் தனது மகிழ்ச்சியையும் பெருமிதத்தையும் வெளிப்படுத்தியுள்ளார்.
2022ஆம் ஆண்டு சென்னையில் நடைபெற்ற செஸ் ஒலிம்பியாட்டின்போது இந்தியா 75 கிராண்ட்மாஸ்டர்களை எட்டும் என எதிர்பார்த்ததாகவும், ஆனால் நான்கே ஆண்டுகளில் அந்த எண்ணிக்கை 100ஆக உயர்ந்திருப்பது மிகுந்த மகிழ்ச்சியளிப்பதாகவும் அவர் தெரிவித்துள்ளார்.
விஸ்வநாதன் ஆனந்த் தொடங்கிவைத்த இந்தியாவின் கிராண்ட்மாஸ்டர் பயணம், தற்போது அனுஜ் ஸ்ரீவத்ரியின் சாதனையுடன் புதிய வரலாற்றைப் படைத்துள்ளது. இந்த மைல்கல், உலக சதுரங்க அரங்கில் இந்தியாவின் வளர்ச்சியையும் இளம் தலைமுறை வீரர்களின் திறமையையும் எடுத்துக்காட்டுகிறது.
