புத்ராஜெயா, டிசம்பர் 23 :
கடந்த வாரம் நாட்டின் பல மாநிலங்களில் ஏற்பட்ட வெள்ளத்தால், சமூக மேம்பாட்டுத் துறையின் (கேமாஸ்) மொத்தம் 207 பாலர் பள்ளிகள், மற்றும் குழந்தை பராமரிப்பு மற்றும் செயல்பாட்டு மையங்கள் பாதிக்கப்பட்டுள்ளன என்று கிராம அபிவிருத்தி அமைச்சர் டத்தோஸ்ரீ மஹசிர் காலிட் தெரிவித்துள்ளார்.
சிலாங்கூரில் 111 மற்றும் பகாங்கில் 58 கேமாஸ் பாலர் பள்ளிகள் மிக மோசமாகப் பாதிக்கப்பட்டுள்ளன. அத்தோடு கேமாஸ் ஊழியர்களில் 357 பேரும் வெள்ளத்தால் பாதிக்கப்பட்டுள்ளனர் என்று அவர் இன்று வெளியிட்ட அறிக்கையின் மூலம் தெரிவித்தார்.
தொடர்ச்சியான பெய்த கனமழையைத் தொடர்ந்து, கடந்த சனிக்கிழமை (டிசம்பர் 18) முதல் கிள்ளான் பள்ளத்தாக்கைத் தாக்கிய வெள்ளம், ஆயிரக்கணக்கான பாதிக்கப்பட்ட குடியிருப்பாளர்கள் வீட்டை விட்டு வெளியேற்றுவதற்கு வழிவகுத்தது, மேலும் சாலைகளில் நிலைசரிவுகள் ஏற்பட்டதால் பல சாலை பயனர்கள் வெளியேற முடியாமல் சிக்கித் தவித்தனர்.
பகாங், மலாக்கா, நெகிரி செம்பிலான், திரெங்கானு, கிளந்தான் மற்றும் பேராக் ஆகிய இடங்களிலும் வெள்ளம் பதிவாகியுள்ளது.
அதைத் தொடர்ந்து, கெமாஸ் பிரிஹாடின் திட்டத்தின் கீழ் இன்று முதல் மூன்று நாட்களுக்கு வெள்ளத்திற்குப் பிந்தைய பணிக்காக பாதிக்கப்பட்ட மாநிலங்களுக்கு கேமாஸ் ஊழியர்களில் இருந்து 1,256 தன்னார்வலர்கள் அணிதிரட்டப்பட்டதாக அவர் கூறினார்.
“இந்த முயற்சி, வெள்ளத்தால் பாதிக்கப்பட்ட கேமாஸ் வளாகத்தை சுத்தம் செய்வதற்காக மட்டுமல்ல, அருகிலுள்ள குடியிருப்பாளர்களின் வீடுகளையும் சுத்தம் செய்வதற்காகும்.
“இந்த துப்புரவுச் செயல்பாட்டால் பாலர் பள்ளிகள் மற்றும் குழந்தை பராமரிப்பு மையங்கள் புதிய பள்ளி அமர்வுக்கு குழந்தைகளை சேர்க்க தங்களை தயார்படுத்திக்கொள்ள முடியும் என்று நாங்கள் நம்புகிறோம்,” என்று அவர் கூறினார்.
இதற்கிடையில், வெள்ளத்திற்குப் பிந்தைய பணியின் கீழ் கவனம் செலுத்தப்பட்ட பகுதிகளில் உலு லங்காட், பூச்சோங், ஷா ஆலம் மற்றும் சிலாங்கூர் மற்றும் பகாங்கில் உள்ள கிள்ளான் ஆகியவை அடங்கும் என்று மஹ்ட்ஸீர் கூறினார்.
“இந்த பணிக்கு உதவ தயாராக உள்ள அனைத்து தன்னார்வலர்களை நான் வாழ்த்துகிறேன், மேலும் இது மற்றவர்கள் எதிர்கொள்ளும் சிரமங்களை எளிதாக்கும் ஆசீர்வதிக்கப்பட்ட செயலாகும்,” என்று அவர் மேலும் கூறினார்.
