பெட்டாலிங் ஜெயா, மார்ச் 17 :
கடந்த ஆண்டு முதல் இதுவரை, தனிநபர் நலன்களுக்காக தவறான அல்லது பொய்யான புகார்களை அளித்ததாக மொத்தம் 86 நபர்கள் மீது குற்றம் சாட்டப்பட்டுள்ளது.
பெட்டாலிங் ஜெயா மாவட்ட காவல்துறைத் தலைவர், துணை ஆணையர் முகமட் ஃபக்ருடின் அப்துல் ஹமீட் கூறுகையில், இந்த புகாரில் கொள்ளை, கற்பழிப்பு, ஆபாசம், பறிப்பு, மிரட்டி பணம் பறித்தல் மற்றும் கிரிமினல் மிரட்டல் ஆகிய குற்றச்சாட்டுகளை உள்ளடக்கியுள்ளது.
86 குற்றச்சாட்டுகளும் 15 முதல் 57 வயதுக்குட்பட்ட குற்றவாளிகளை உள்ளடக்கியது.
“மொத்தம் 66 வழக்குகள் தண்டனையுடன் முடிக்கப்பட்டு, குறைந்தபட்ச அபராதம் RM500 முதல் RM2,500 வரை விதிக்கப்பட்டுள்ளது, அதே நேரத்தில் 20 வழக்குகள் இன்னும் விசாரணையில் உள்ளன,” என்று அவர் இன்று வெளியிட்ட ஒரு அறிக்கையில் தெரிவித்தார்.
அவர் தொடர்ந்து கூறுகையில், பொய்யான புகார் அளித்த எந்த தரப்பினருடனும் போலீசார் சமரசம் செய்து கொள்ளவில்லை.
“மாவட்டத்தில் நடக்கும் குற்றச் சம்பவங்கள் குறித்து எந்தத் தரப்பினரும் பொய்யான செய்திகளை வெளியிடுவதை போலீசார் அனுமதிக்க மாட்டார்கள் என்றும், தனிப்பட்ட நலன் கருதி பொய்யான அறிக்கைகள் வெளியிட வேண்டாம் என்றும் பொதுமக்களை கேட்டுக்கொள்கிறோம்,” என்றார்.
