பாசீர் மாஸில் உள்ள கம்போங் சிபுட் மெராந்தியில் சாலையோரத்தில், நேற்று பிற்பகல் போதைப்பொருள் வியாபாரி ஒருவர் கத்தியால் குத்தியதில் லான்ஸ் கார்ப்ரல் அந்தஸ்தில் உள்ள இரண்டு போலீஸ்காரர்கள் பலத்த காயமடைந்தனர்.
மாலை 6 மணியளவில் நடந்த சம்பவத்தில், பாதிக்கப்பட்ட போலீஸ்காரரான முகமட் ஆரிப் இஸ்மாயில் (28) என்பவருக்கு முதுகிலும், வலது மணிக்கட்டு மற்றும் இடது கன்னத்தில் காயங்கள் ஏற்பட்டன.
மற்றய உறுப்பினரான அமினுல்லா இஸ்லாஹூடின், 29, என்பவருக்கு அவரது இடது கை மற்றும் அவரது தொடையில் பலத்த காயங்கள் ஏற்பட்டது.
இரண்டு போலீஸ் உறுப்பினர்களும் கிளாந்தான் காவல் படைத் தலைமையகத்தின் (IPK) போதைப்பொருள் குற்றப் புலனாய்வுத் துறையில் பணிபுரிந்து வருவதாகவும், தற்போது அவர்களின் உடல் நிலை சீரான நிலையில் இருப்பதாகவும், அவர்கள் ராஜா பெரெம்புவான் ஜைனாப் II மருத்துவமனையில் (HRPZ II) சிகிச்சை பெற்று வருவதாகவும் மாநில காவல்துறைத் தலைவர் டத்தோ முகமட் ஜாக்கி ஹாருன் தெரிவித்தார்.
சம்பவத்திற்கு முன்னர், போதைப்பொருள் கடத்தல் நடவடிக்கைகள் தொடர்பான தகவலைப் பெற்ற பின்னர், பாதிக்கப்பட்ட இருவரும் பல உறுப்பினர்களுடன் சேர்ந்து ஒரு இடத்தை சோதனையிட்டனர். “சம்பவத்தின் போது, பணியில் இருந்த உறுப்பினர்கள் ஒரு கருப்பு மோட்டார் சைக்கிளில் சந்தேக நபர் ஒரு கருப்பு பிளாஸ்டிக்கை எடுத்துச் செல்வதைக் கண்டனர்.
“30 வயதுடைய சந்தேக நபரை கைது செய்ய முற்பட்ட போது, அந்த நபர் மாற்றியமைக்கப்பட்ட கத்தியை வைத்திருந்ததில் போலீசாருக்கும் அவருக்கும் இடையில் சண்டை ஏற்பட்டுள்ளது. சந்தேக நபர் கத்தியால் குத்தியதன் விளைவாக இரண்டு உறுப்பினர்கள் காயமடைந்தனர், ”என்று அவர் இன்று கிளாந்தான் மாநில காவல்துறை தலைமையகத்தில் நடந்த செய்தியாளர் கூட்டத்தில் கூறினார்.
சில நிமிடங்கள் சண்டைக்குப் பிறகு, சந்தேக நபரை போலீசாரால் கைது செய்யப்பட்டார் என்றும்,சந்தேக நபரால் கொண்டுவரப்பட்ட கறுப்பு பிளாஸ்டிக் பையை பரிசோதித்ததில் சந்தேகத்திற்குரிய 12,000 குதிரை மாத்திரைகள் மற்றும் 282.9 கிராம் ஹெரோயின் என்பன கண்டுபிடிக்கப்பட்டன.
“பறிமுதல் செய்யப்பட்ட போதைப்பொருளின் மதிப்பிடப்பட்ட மதிப்பு RM232,000 மதிப்புடையது, இதனை மொத்தம் 14,829 போதைப்பித்தர்கள் பயன்படுத்த முடியும் என்றும் அவர் கூறினார்.
சந்தேகநபர் நேற்றிலிருந்து ஏப்ரல் 20 வரை ஏழு நாட்களுக்கு விளக்கமறியலில் வைக்கப்பட்டுள்ளார் என்றும், ஆபத்தான போதைப்பொருள் சட்டம் 1952 இன் பிரிவு 39B மற்றும் குற்றவியல் சட்டத்தின் பிரிவு 307/186 இன் படி வழக்கு விசாரிக்கப்பட்டது என்றும் முஹமட் ஜாக்கி கூறினார்.
