சமூக ஊடகங்களில் மாட்சிமை தங்கிய பேரரசரை அவமதித்ததாக 32 வயது கர்ப்பிணி பெண்ணை போலீசார் கைது செய்துள்ளனர்.
புக்கிட் அமானின் குற்றப் புலனாய்வுப் பிரிவினரால் (USJT) அந்தப் பெண் ஜூன் 13 அன்று செபராங் பிறை உத்தாரா மாவட்ட காவல்துறைத் தலைமையக வளாகத்தில் தடுத்து வைக்கப்பட்டார்.
கடந்த ஜூன் 7ஆம் தேதி, சமூக ஊடகங்களில் பொது ஒழுங்கை பாதிக்கக்கூடிய பல கருத்துக்களை வெளியிட்டது குறித்து பொதுமக்களிடம் இருந்து காவல்துறைக்கு அறிக்கை கிடைத்தது.
“அதைத் தொடர்ந்து, ஜூன் 13 அன்று, குறித்த பெண் கைது செய்யப்பட்டார் என்று, மாநில காவல்துறைத் தலைவர் டத்தோ காவ் கோக் சின் கூறினார்.
“மே 13, 1969 கலவரத்தைத் தூண்டியதற்காக லிம் கிட் சியாங்கிற்கு சமீபத்தில் டான்ஸ்ரீ பதக்கம் வழங்கப்பட்டது தொடர்பாக, மேன்மை தங்கிய பேரரசருக்கு எதிராக சமூக ஊடகங்களில் அவமானகரமான உள்ளடக்கத்தைப் பதிவேற்றியதற்காக அவர் கைது செய்யப்பட்டார்.
“விசாரணைக்கு உதவுவதற்காக அவரிடமிருந்து மடிக்கணினி, கைபேசி மற்றும் சிம் கார்டு போன்ற ஆதாரங்கள் பறிமுதல் செய்யப்பட்டன,” என்று அவர் மேலும் கூறினார்.
பெண் ஆறு மாத கர்ப்பிணியாக இருந்ததால் அதே நாளில் போலீஸ் ஜாமீனில் விடுவிக்கப்பட்டதாக காவ் கூறினார்.
தேசத்துரோகச் சட்டம் 1948 இன் பிரிவு 4(1) மற்றும் தகவல் தொடர்பு மற்றும் மல்டிமீடியா சட்டம் 1998 இன் பிரிவு 233 ஆகியவற்றின் கீழ் இந்த வழக்கு விசாரிக்கப்படுகிறது.
