மூன்று கார்கள் மோதிய விபத்தில் தந்தையும் மகனும் பலி

நீலாய், ஆகஸ்ட்டு 6:

நீலாய் அருகே தெற்கு நோக்கிச் செல்லும் வடக்கு-தெற்கு நெடுஞ்சாலையின் (பிளஸ்) 276.9 கிலோமீட்டரில் நேற்றிரவு மூன்று கார்களை உட்படுத்திய விபத்தில் தந்தை மற்றும் மகன் ஆகியோர் உயிரிழந்தனர்.

இரவு 11.30 மணியளவில் இடம்பெற்ற இச்சம்பவத்தில், பெரோடுவா காஞ்சிலின் ஓட்டுநர் சம்பவ இடத்திலேயே உயிரிழந்துள்ளதுடன், அவரது இரண்டு வயது மகன் மருத்துவ மனையில் சிகிச்சை பெற்று வந்த நிலையில் உயிரிழந்தார்.

காஜாங்கில் இருந்து மலாக்கா செல்லும் வழியில் பாதிக்கப்பட்டவர் காரை ஓட்டிச் சென்றது முதற்கட்ட விசாரணையில் கண்டறியப்பட்டதாக நீலாய் மாவட்ட காவல்துறை தலைவர், கண்காணிப்பாளர் அப்துல் மாலிக் ஹாசிம் தெரிவித்தார்.

“சம்பவம் நடந்த இடத்திற்கு வந்தபோது, ​​​​காரின் டயர் வெடித்ததால், சம்பந்தப்பட்ட வாகனம் கட்டுப்பாட்டை இழந்து வலது பாதையில் உள்ள சாலை தடுப்பில் மோதியதாக சந்தேகிக்கப்படுகிறது என்று அவர் இன்று ஒரு ஊடக அறிக்கையில் தெரிவித்தார்.

“அவரது 27 வயது மனைவி மற்றும் மற்றொரு ஐந்து வயது குழந்தை படுகாயமடைந்துள்ளதாக தெரிவிக்கப்பட்டுள்ளது. ஏனைய இரண்டு வாகன ஓட்டுநர்கள் மற்றும் மற்றொரு காரில் பயணித்த ஒருவருக்கும் சிறிய காயம் ஏற்பட்டது,” என்று அவர் கூறினார்.

இந்த வழக்கு சாலை போக்குவரத்து சட்டம் 1987 பிரிவு 41(1)ன் படி விசாரிக்கப்படுகிறது,” என்றும் சம்பவம் தொடர்பான தகவல் தெரிந்தவர்கள், நீலாய் மாவட்ட காவல்துறை தலைமையகத்தின் போக்குவரத்து புலனாய்வு அலுவலகம் அல்லது 019-4611794 என்ற எண்ணில் ஃபட்ஸிலா முகமட் ஜைனுதீனையும் தொடர்பு கொள்ளுமாறு கேட்டுக் கொள்ளப்படுகிறார்கள் என்றார்.