கோலாலம்பூர்: மத்திய கிழக்கில் தற்போது நிலவும் மோதல்களுக்கு மத்தியில், இஸ்ரேல் அல்லது இஸ்ரேலுக்கு ஆதரவளிக்கும் எந்தவொரு நாடும் தொடர்புடைய தயாரிப்புகள் அல்லது பிராண்டுகளைத் தொடர்ந்து புறக்கணிக்குமாறு மலேசியர்களை முன்னாள் பிரதமர் டாக்டர் மகாதீர் முகமது வலியுறுத்தியுள்ளார்.
நாங்கள் எங்கள் புறக்கணிப்பு முயற்சிகளைத் தொடர வேண்டும். ஏனென்றால் அவர்கள் (சம்பந்தப்பட்ட நிறுவனங்கள்) பாலஸ்தீனியர்களைக் கொல்லும் இஸ்ரேலின் செயல்களை ஆதரிப்பவர்கள் என்று அமெரிக்க தூதரகத்திற்கு வெளியே ஆறு நாள் பாலஸ்தீன சார்பு கூட்டத்தில் மகாதீர் கூறினார். பாலஸ்தீனியர்களின் மரணத்திற்கு காரணமான அமெரிக்காவிற்கு எதிராக புத்ராஜெயா வலுவான நடவடிக்கை எடுக்க வேண்டும் என்றும் மகாதீர் வலியுறுத்தினார்.
ஆம், வணிக நடவடிக்கைகள் காரணமாக நாங்கள் இன்னும் அமெரிக்காவுடன் இராஜதந்திர உறவுகளைக் கொண்டுள்ளோம். ஆனால் பாலஸ்தீனியர்களைக் கொல்வதற்கான அமெரிக்காவின் அணுகுமுறையை நாங்கள் ஏற்கவில்லை என்பதைக் காட்ட இன்னும் வேறு வழிகள் உள்ளன என்று அவர் “வலுவான நடவடிக்கை” புத்ராஜெயா குறித்து விவரிக்காமல் கூறினார்.
தனது வாழ்நாளில் பல போர்களையும் ராணுவ மோதல்களையும் கண்டிருந்தாலும், காசா பகுதியில் இஸ்ரேலுக்கும் ஹமாஸுக்கும் இடையே தற்போது நடக்கும் மோதலைப் போல ஒரு கொடூரமான போரை தாம் பார்த்ததில்லை என்று முன்னாள் அம்னோ தலைவர் கூறினார். இஸ்ரேலிய இராணுவம் அடிப்படை மனித உரிமைகளை புறக்கணித்துள்ளதாகவும், போரில் வெற்றி பெறுவதற்கு பதிலாக பாலஸ்தீனத்தை துடைத்தழிப்பதே அவர்களின் இலக்கு என்றும் அவர் கூறினார்.
டிசம்பர் 9 அன்று, காசா மோதலில் உடனடியாக போர் நிறுத்தம் கோரி ஐக்கிய நாடுகள் சபையின் தீர்மானத்தை அமெரிக்கா வீட்டோ செய்தது. இந்த முடிவை பிரதமர் அன்வார் இப்ராஹிம் அன்றே விமர்சித்தார். அமெரிக்கா எடுத்த “மோசமான முடிவால்” வருத்தப்படுவதாக அவர் கூறினார். இஸ்ரேல்-பாலஸ்தீன மோதல் மற்றும் ஹமாஸ் விவகாரத்தில் மலேசியாவின் நிலைப்பாட்டை மாற்ற கோலாலம்பூரில் உள்ள அமெரிக்க தூதரகத்திடம் இருந்து மலேசியாவுக்கு மூன்று “டிமார்ச்கள்” அல்லது இராஜதந்திர அறிவிப்புகள் வந்துள்ளதாக அக்டோபரில் அன்வார் கூறினார். ஹமாஸை பயங்கரவாத அமைப்பாக அங்கீகரிக்க மறுக்கும் நிலைப்பாட்டை மாற்றிக்கொள்ளுமாறு மலேசியாவை அமெரிக்கா இரண்டு முறை கேட்டுக் கொண்டது.
