மலேசியாவுக்கும் இந்தியாவுக்கும் இடையிலான உறவைப் பாராட்டிய பிரதமர் அன்வார் இப்ராஹிம், வரும் ஆண்டுகளில் இரு நாடுகளும் வலுவான, சகோதரத்துவ பங்காளிகளாக மாற முடியும் என்றார். அன்வார், இந்தியப் பிரதமர் நரேந்திர மோடியுடனான தனது நீண்டகால நட்பைப் பாராட்டுவதாகவும் அவர் மிகவும் நேர்மையானவர் என்றும் கூறினார்.
மோடி ஒரு பிரதமர் மட்டுமல்ல, அவர் எனது சகோதரரும் கூட.
நான் பிரதமராக இல்லாத போதும் அவர் மிகவும் அன்பாகவும் நேர்மையாகவும் இருந்தார். இந்த நட்பு எனக்கும், எனது பிரதிநிதிகளுக்கும், நமது நாட்டிற்கும் அர்த்தமுள்ளதாக இருக்கிறது என்று புதுடில்லியில் மோடியுடன் கூட்டாக செய்தியாளர் சந்திப்பில் கூறினார். அன்வார் தற்போது மூன்று நாள் பயணமாக இந்தியா சென்றுள்ளார். தனிப்பட்ட முறையிலும் மலேசிய அரசாங்கத்தின் சார்பிலும் இந்த விஜயம் மிகவும் முக்கியமானது என அவர் விவரித்தார். மலேசியாவும் இந்தியாவும் இரண்டு வலுவான சகோதர நாடுகளாக உருவாகும். இருப்பினும், மலேசியாவுக்கும் இந்தியாவுக்கும் இடையிலான உறவு சமீபத்திய ஆண்டுகளில் தீவிரமாக தொடரப்படவில்லை என்பதை அன்வார் ஒப்புக்கொண்டார்.
இரு நாடுகளின் முதல் பிரதமர்களான ஜவஹர்லால் நேரு – துங்கு அப்துல் ரஹ்மான் காலத்திலிருந்தே வலுவான அடித்தளம் இருந்தபோதிலும், உறவுகளை வலுப்படுத்த இன்னும் பலவற்றைச் செய்திருக்கலாம் என்றார். கடந்த பல வருடங்களாக எங்கள் உறவுகள் சரியாக அமையவில்லை என்பது துரதிஷ்டவசமானது.
இந்தியாவும் மலேசியாவும் பல கலாச்சாரங்கள் மற்றும் பல சமயங்கள் உட்பட பல ஒற்றுமைகளைப் பகிர்ந்து கொண்டதாக அன்வார் கூறினார். இந்த பிணைப்புகளை நாம் மேலும் வலுப்படுத்த வேண்டும். டிஜிட்டல் மயமாக்கல், ஆற்றல் மாற்றம், உணவு பாதுகாப்பு மற்றும் குறைக்கடத்தி தொழில் போன்ற துறைகளில் இரு நாடுகளும் மிகவும் நெருக்கமாக பணியாற்ற வேண்டும் என்றும் அன்வார் அழைப்பு விடுத்தார்.
நீண்ட கால தாமதத்தை மோடி பொறுத்துக் கொள்ள மாட்டார். எனவே எங்கள் ஊழியர்கள் நடவடிக்கை முன்னேற்றம் குறித்து தெரிவிக்க மூன்று மாத கால அவகாசம் நிர்ணயித்துள்ளோம் என்றார். குறிப்பாக செம்பனை மற்றும் செம்பனை சார்ந்த பொருட்களுக்கு, மலேசியாவிற்கு இந்தியா முக்கிய வர்த்தக பங்காளியாக உள்ளது. கடந்த ஆண்டு, இது மொத்தம் 3.3 மில்லியன் டன்கள், அதாவது 3 பில்லியன் அமெரிக்க டாலர்கள் (RM14 பில்லியன்) அல்லது மலேசியாவின் மொத்த பாமாயில் ஏற்றுமதியில் 13% ஆகும்.
