மாணவர்களின் வீடியோ, புகைப்படங்களை சமூக ஊடகங்களில் பகிர்ந்த பேருந்து ஓட்டுநர் கைது

ஜோகூர் பாரு: பள்ளிப் பேருந்து ஓட்டுநர் ஒருவர், தான் அழைத்துச் செல்லும் மாணவர்களை வீடியோவாகப் பதிவேற்றி, புகைப்படத்தை வெளியிட்டதற்காக குளுவாங்,  சிம்பாங் ரெங்காமில் இன்று அதிகாலை கைது செய்யப்பட்டார். 24 வயதான உள்ளூர் இளைஞனை குளுவாங் மாவட்ட காவல்துறை தலைமையகத்தின் (IPD) குற்றப் புலனாய்வுப் பிரிவின் காவலர்கள் அதிகாலை 2.57 மணிக்கு கைது செய்ததாக ஜோகூர் காவல்துறைத் தலைவர் சிபி எம் குமார் தெரிவித்தார். சம்பவத்திற்கு பயன்படுத்தப்பட்டதாக கருதப்படும் கைத்தொலைபேசியும் மேலதிக விசாரணைக்காக பறிமுதல் செய்யப்பட்டுள்ளது.

விசாரணைகள் நடந்து வருகின்றன. வீடியோ காட்சிகளில் உள்ள குழந்தைகளின் பெற்றோர்கள் விசாரணைக்கு உதவ முன்வருவதை காவல்துறை வரவேற்கிறது என்று அவர் இன்று ஒரு அறிக்கையில் தெரிவித்தார். குழந்தைகளுக்கு எதிரான பாலியல் குற்றங்கள் சட்டம் 2017 இன் பிரிவு 15(a)(iii) மற்றும் குழந்தைகள் சட்டம் 2001 பிரிவு 15(2) ஆகியவற்றின் கீழ் இந்த வழக்கு விசாரிக்கப்படுகிறது என்றார்.

பெண்கள், குடும்பம் மற்றும் சமூக மேம்பாட்டு அமைச்சர் டத்தோஸ்ரீ நான்சி சுக்ரி, தான் ஏற்றிச் செல்லும் மாணவர்களின் வீடியோக்களை வெளியிடும் பள்ளிப் பேருந்து ஓட்டுநர்கள் மீது காவல் துறை புகார் அளிக்குமாறு குழந்தைகள் மேம்பாட்டுத் துறை (ஜேபிகேகே) அதிகாரிக்கு உத்தரவிட்டுள்ளார். இந்த விவகாரம் தொடர்பாக நான்சி கூறுகையில், ஜோகூர் காவல் படைத் தலைமையகத்தின் பாலியல், பெண்கள் மற்றும் குழந்தைகள் குற்றப் புலனாய்வுப் பிரிவு (D11) உடன் ஒத்துழைக்க அமைச்சகம் தயாராக உள்ளது.

ஓட்டுநரின் செயல் ஏற்றுக்  கொள்ள முடியாதது என்பதோடு அதனை இயல்பாக்கப்படக்கூடாது. பெற்றோரின் அனுமதியின்றி குழந்தையின் படங்கள் அல்லது வீடியோக்களைப் பகிர்வது குழந்தையின் உரிமைகள் மற்றும் தனியுரிமையை மீறுவதாகும் (Chlid Act 2001) என்று அவர் தனது அதிகாரப்பூர்வ X கணக்கில் இன்று தெரிவித்தார்.

ஒரு இளம் பள்ளி பேருந்து ஓட்டுநருக்கு சொந்தமான டிக்டாக் இடுகைகளின் பல ஸ்கிரீன் ஷாட்களைப் பகிர்ந்த X இல் ஒரு பயனரின் இடுகைக்கு பதிலளிக்கும் விதமாக அவர் இதைச் சொன்னார். அவர் பேருந்தில் உள்ள குழந்தைகளை தனது ‘crush’ அல்லது ‘kesayangan(அன்பானவர்) என்று குறிப்பிட்டார்.

TikTok காட்சிகளில் பெர்னாமாவின்  கருத்து அடிப்படையில், ‘Abang Bas’ என்ற பெயரில் 600,000 க்கும் அதிகமான பின்தொடர்பவர்களைக் கொண்ட கணக்குப் பயனர், பள்ளிப் பேருந்தை ஓட்டும் போது, ​​மாணவர்களின் முகம் தெளிவாகத் தெரியும்படி வீடியோக்களை பதிவு செய்துள்ளார்.