குளுவாங்: ஜோகூர் மாநிலத்தின் குளுவாங் நகரில் உள்ள ஒரு உயர்நிலைப் பள்ளி வளாகத்தில் முதலைக் குட்டி ஒன்று கண்டுபிடிக்கப்பட்டது. பின்னர் அது தீயணைப்பு மற்றும் மீட்புத் துறை அதிகாரிகளால் பாதுகாப்பாக பிடிக்கப்பட்டது.
சனிக்கிழமை (செப்டம்பர் 6) காலை சுமார் 8.35 மணியளவில் பிடிபட்ட அந்த முதலைக் குட்டி, 1.2 மீட்டர் நீளமும் சுமார் 6 கிலோ எடையும் கொண்டதாக தெரிவிக்கப்பட்டது.
ரெங்கம் தீயணைப்பு மற்றும் மீட்பு நிலையத் தலைவர் முகமது நிசார் மம்முன் தெரிவித்ததாவது, ஆறு பேர் கொண்ட குழு பள்ளிக்கு அனுப்பப்பட்டு நடவடிக்கை மேற்கொண்டது. பள்ளியின் பாதுகாப்பு ஊழியர் முதலைக் குட்டியை முதலில் கண்டுபிடித்து, உடனடியாக ஒரு ஆசிரியரிடம் தகவல் தெரிவித்தார். அதன் பின்னர், காலை 8.15 மணிக்கு சம்பவம் தங்களுக்கு அறிவிக்கப்பட்டது.
முதலைக் குட்டி எங்கு இருந்து வந்தது என்பது இதுவரை தெளிவாகத் தெரியவில்லை. அதிர்ஷ்டவசமாக, வார இறுதி நாளாக இருந்ததால் பள்ளியில் மாணவர்கள் எவரும் இல்லை என அவர் குறிப்பிட்டார்.
தற்போது முதலைக் குட்டி ரெங்கம் தீயணைப்பு நிலையத்தில் தற்காலிகமாக வைக்கப்பட்டுள்ளது. பின்னர் அது வனவிலங்கு மற்றும் தேசியப் பூங்காக்கள் கழகத்தினரிடம் ஒப்படைக்கப்படும் என அதிகாரிகள் தெரிவித்தனர்.
