சிட்னி: ஆஷஸ் கிரிக்கெட் தொடரின் ஐந்தாவது டெஸ்ட் போட்டியில், ஆஸ்திரேலிய அணியின் நட்சத்திர வீரர் ஸ்டீவ் ஸ்மித் புதிய வரலாறு படைத்துள்ளார். கிரிக்கெட் உலகின் ஜாம்பவானான டான் பிராட்மேன் இங்கிலாந்து அணிக்கு எதிராகக் குவித்திருந்த மொத்த ரன்கள் சாதனையை ஸ்மித் முறியடித்துள்ளார்.
சிட்னி கிரிக்கெட் மைதானத்தில் நடைபெற்று வரும் இந்த டெஸ்ட் போட்டியில், ஆஸ்திரேலிய அணியை வழிநடத்தி வரும் ஸ்மித், முதல் இன்னிங்ஸில் மிகச் சிறப்பாக விளையாடி சதம் அடித்தார். இதன் மூலம் சர்வதேச கிரிக்கெட்டில் இங்கிலாந்து அணிக்கு எதிராக அதிக ரன்கள் குவித்த வீரர் என்ற பெருமையை அவர் பெற்றுள்ளார்.
சதத்துடன் வந்த சாதனை 2025-26 ஆஷஸ் தொடரின் கடைசி டெஸ்ட் போட்டியில் டாஸ் வென்று பேட்டிங் செய்த ஆஸ்திரேலிய அணிக்கு, ஸ்டீவ் ஸ்மித் தூணாக நின்றார். 220 பந்துகளைச் சந்தித்த அவர், பொறுப்புடன் விளையாடி 138 ரன்களைக் குவித்தார். இது டெஸ்ட் போட்டிகளில் அவரது 37-வது சதமாகும். இந்த இன்னிங்ஸின் போது, சர்வதேச கிரிக்கெட்டில் (டெஸ்ட், ஒருநாள் மற்றும் டி20) இங்கிலாந்து அணிக்கு எதிராக 5000 ரன்களைக் கடந்த இரண்டாவது வீரர் என்ற மைல்கல்லை ஸ்மித் எட்டினார்.
இதற்கு முன், கிரிக்கெட் ஜாம்பவான் டான் பிராட்மேன் இங்கிலாந்து அணிக்கு எதிராக 37 டெஸ்ட் போட்டிகளில் 63 இன்னிங்ஸ் விளையாடி 5028 ரன்களைக் குவித்திருந்ததே சாதனையாக இருந்தது. தற்போது, ஸ்டீவ் ஸ்மித் இங்கிலாந்துக்கு எதிராக அனைத்து விதமான போட்டிகளையும் சேர்த்து 90 போட்டிகளில் 122 இன்னிங்ஸ் விளையாடி 5094 ரன்களைக் குவித்து, பிராட்மேனின் சாதனையை முறியடித்து முதலிடத்தைப் பிடித்துள்ளார்.
