கோலாலம்பூர், தேசிய பொருளாதார நடவடிக்கைக் குழுவின் (MTEN) கீழ் இயங்கும் ஒரு சிறப்புக் குழுவின் மூலம், மேற்கு ஆசியாவில் நிலவும் மோதலால் பல்வேறு துறைகளை, குறிப்பாக டிஜிட்டல் துறையைப் பாதிக்கக்கூடிய பிரச்சினைகள் குறித்து அரசாங்கம் ஆய்வு செய்யும் என அதன் அமைச்சர் கோபிந்த் சிங் தெரிவித்தார்.
பிரதமர் டத்தோ ஶ்ரீ அன்வர் இப்ராஹிம் தலைமையில் நடைபெறும் வாராந்திர MTEN கூட்டத்தில், மோதலின் சாத்தியமான விளைவுகள் மதிப்பிடப்பட்டு, பொருத்தமான நடவடிக்கைகள் எடுக்கப்படும் என்று டிஜிட்டல் துறை அமைச்சர் கோபிந்த் சிங் டியோ கூறினார். நாங்கள் பிரச்சினைகளை ஆழமாக ஆராய்ந்து, எந்தவொரு சூழ்நிலையையும் சமாளிக்கத் தேவையான நடவடிக்கைகளை எடுக்கத் தயாராவோம் என்று இன்று இங்கு ஸ்டாண்டர்ட் சார்ட்டர்ட் குளோபல் ஃபியூஷன் சென்டரைத் தொடங்கி வைத்த பின்னர் செய்தியாளர் சந்திப்பில் அவர் கூறினார்.
இந்தக் கூட்டத்தில் முக்கிய அமைச்சகங்களும், தொழில்துறை பங்குதாரர்களும் ஒன்றிணைந்து, நடவடிக்கைகளை ஒருங்கிணைக்கவும், பொருளாதார மீள்திறனை வலுப்படுத்தவும், மலேசியர்களின் வாழ்வாதாரமும் நாட்டின் வணிகங்களும் பாதுகாக்கப்படுவதை உறுதி செய்யவும் முடியும் என்று கோபிந்த் மேலும் கூறினார். அதுமட்டுமின்றி, தேசிய நலன்களையும் மக்களின் நல்வாழ்வையும் பாதுகாப்பதில் கவனம் செலுத்தும் அதே வேளையில், ஸ்திரத்தன்மை, நிதானம் மற்றும் ஆக்கப்பூர்வமான ஈடுபாட்டிற்கு அரசாங்கம் உறுதியுடன் இருப்பதாக அவர் கூறினார்.
அதே நேரத்தில், தயார்நிலையை உறுதிப்படுத்த நாங்கள் நடைமுறை நடவடிக்கைகளை எடுத்து வருகிறோம். எதிர்பார்க்கப்படும் எந்தவொரு இடையூறுக்கும் நாங்கள் சரியான முறையிலும், முன்கூட்டியேவும், திறம்படவும் பதிலளிக்க, எரிசக்தி விநியோகம், வர்த்தகப் பரிமாற்றங்கள் மற்றும் செலவு அழுத்தங்கள் மீதான தாக்கங்கள் உள்ளிட்ட சாத்தியமான சூழ்நிலைகளை எங்கள் பாதுகாப்பு, பொருளாதார முகமைகள் தீவிரமாக மதிப்பிட்டு வருகின்றன என்று அவர் கூறினார்.
இதற்கிடையில், ஸ்டாண்டர்ட் சார்ட்டர்ட் இன்று மலேசியாவில் தனது முதல் உலகளாவிய ஒருங்கிணைப்பு மையத்தைத் (Global Fusion Centre) தொடங்கி வைத்துள்ளது. இது, ஒரு வலுவான திறமையாளர் சூழலமைப்பாகவும், குழுமத்திற்கான ஒரு முக்கிய மூலோபாய தொழில்நுட்ப மையமாகவும் நாட்டின் நிலையை வலுப்படுத்துகிறது. ஒரு அறிக்கையில், வங்கியின் உலகளாவிய வணிகச் சேவைகள் (GBS) மையத்தில் அமைந்துள்ள இந்த மையம், செயல்பாட்டு நெகிழ்வுத்தன்மையை மேம்படுத்தவும், அனைத்து பங்குதாரர்களுடனும் டிஜிட்டல் நம்பிக்கையை வலுப்படுத்தவும் நிகழ்நேர நுண்ணறிவுகளையும் செயற்கை நுண்ணறிவு (AI) சார்ந்த அமைப்புகளையும் ஒருங்கிணைக்கிறது என்று வங்கி கூறியுள்ளது.
