மலாக்கா | ஏப்ரல் 7, 2026
மலாக்கா, செங் ஹைட்ஸ் (Cheng Heights) பகுதியில் இன்று காலை நிகழ்ந்த 6 வாகனங்கள் சம்பந்தப்பட்ட சங்கிலித் தொடர் விபத்தில் இருவர் காயமடைந்தனர். விபத்தை ஏற்படுத்திய புரோட்டான் சாகா (Proton Saga) காரின் ஓட்டுநர் அங்கிருந்து தப்பியோடியுள்ளதால், அவரைப் போலீசார் தீவிரமாகத் தேடி வருகின்றனர்.
இன்று காலை சுமார் 9:51 மணியளவில் லெபு ஏ.எம்.ஜே (Lebuh AMJ) சாலையில் இந்த விபத்து நிகழ்ந்துள்ளது என்று, மலாக்கா போக்குவரத்து விசாரணை மற்றும் அமலாக்கப் பிரிவுத் தலைவர் சுப்ரிடெண்டண்ட் முகமட் ஜாகி ரமாட் கூறினார்.
மாலிம் (Malim) பகுதியிலிருந்து வந்த புரோட்டான் சாகா கார் ஒன்று திடீரென கட்டுப்பாட்டை இழந்து, சாலைத் தடுப்பைத் தாண்டி எதிர் திசையில் பாய்ந்தது. அந்த கார் முதலில் பண்டார் மலாக்கா நோக்கிச் சென்று கொண்டிருந்த மெர்சிடிஸ் பென்ஸ் (Mercedes-Benz) காரின் மீது மோதியது. பின்னர் நிலைதடுமாறி சுழன்ற அந்த கார், வரிசையாக டொயோட்டா வியோம், பெரோடுவா பெஸா, நிசான் வேன் மற்றும் டொயோட்டா கேம்ரி ஆகிய வாகனங்கள் மீது மோதி நின்றது.
இந்த விபத்தில் டொயோட்டா வியோஸ் காரில் பயணம் செய்த 63 மற்றும் 32 வயதுடைய இருவர் தலை, கண் மற்றும் இடது காலில் பலத்த காயமடைந்தனர். அவர்கள் மலாக்கா பொது மருத்துவமனையில் முதலுதவி பெற்று, பின்னர் மேலதிக சிகிச்சைக்காக மாக்கோத்தா (Mahkota) மருத்துவமனைக்கு மாற்றப்பட்டனர்.
விபத்தை ஏற்படுத்திய புரோட்டான் சாகா கார் ஒரு வெளிநாட்டவருக்குச் சொந்தமானது எனத் தெரியவந்துள்ளது. எனினும், விபத்தின் போது காரை ஓட்டியவர் யார் என்பது இன்னும் உறுதி செய்யப்படவில்லை. அவர் சம்பவ இடத்திலிருந்து தப்பியோடியுள்ளார்.
விபத்து நடந்த பகுதியில் உள்ள சிசிடிவி (CCTV) காட்சிகள் மற்றும் பிற வாகனங்களின் டேஷ்கேம் (Dashcam) பதிவுகளைப் போலீசார் ஆய்வு செய்து வருகின்றனர்.
இந்த விபத்து குறித்துத் தகவல் தெரிந்தவர்கள் அல்லது ஓட்டுநரைப் பார்த்தவர்கள் விசாரணை அதிகாரி சர்ஜன் இக்ராம் அஸ்மியை (011-26559539) தொடர்பு கொள்ளுமாறு அல்லது அருகிலுள்ள காவல் நிலையத்தில் தகவல் தெரிவிக்குமாறு கேட்டுக்கொள்ளப்பட்டுள்ளனர். இச்சம்பவம் குறித்துச் சாலைப் போக்குவரத்துச் சட்டம் 1987-இன் பிரிவு 43(1)-இன் கீழ் விசாரணை நடைபெற்று வருகிறது.
