லஹாட் டத்து:
லஹாட் டத்து மற்றும் தாவாவ் (Tawau) ஆகிய இடங்களை இணைக்கும் முக்கியச் சாலையின் ஒரு பகுதி சரிந்து விழுந்ததால், இரு நகரங்களுக்கு இடையேயான போக்குவரத்து முற்றிலும் துண்டிக்கப்பட்டுள்ளது.
ஜாலான் சிலாம் (Jalan Silam) பகுதியில் சுமார் 50 மீட்டர் தூரத்திற்கு சாலை உள்வாங்கியுள்ளது.
தற்போதைக்கு இந்தச் சாலை வழியாக வாகனங்கள் செல்ல முடியாது. தாவாவ் மற்றும் லஹாட் டத்து இடையே வேறு மாற்றுப் பாதைகள் எதுவும் இல்லை என்று லஹாட் டத்து மாவட்ட அதிகாரி ஃபிருஸ் இஸுல்தீன் தெரிவித்துள்ளார்.
இந்நிலையில் பொதுப்பணித்துறை (JKR) அதிகாரிகளுடன் ஆலோசிக்கப்பட்டு, தற்காலிகமாக வாகனங்கள் செல்வதற்கு ஏதுவாக ஒரு பக்கவாட்டுப் பாதை (Diversion) அமைக்கும் பணி நடைபெற்று வருகிறது. இது ஒரு மணி நேரத்திற்குள் தயாராகிவிடும் என எதிர்பார்க்கப்படுகிறது.
அந்தப் பகுதியை கடக்கும் வாகன ஓட்டிகள் மிகுந்த எச்சரிக்கையுடன் இருக்குமாறு கேட்டுக்கொள்ளப்பட்டுள்ளனர்.
மேலும் பாதுகாப்புப் பணியில் ஈடுபட்டுள்ள அதிகாரிகளின் அறிவுறுத்தல்களைப் பின்பற்றுமாறு அறிவுறுத்தப்பட்டுள்ளது.
போக்குவரத்து நெரிசல் ஏற்பட வாய்ப்புள்ளதால், பொதுமக்கள் தங்கள் பயணத்தை முன்கூட்டியே திட்டமிடுமாறு கேட்டுக்கொள்ளப்படுகிறார்கள்.
தற்போது சமூக வலைதளங்களில் இந்தச் சாலை சரிவு தொடர்பான புகைப்படங்கள் வைரலாகி வருகின்றன. இதில் ஏராளமான வாகனங்கள் அந்தப் பகுதியில் சிக்கித் தவிப்பதைக் காண முடிகிறது.
