லோகேஷ் கனகராஜ் இயக்கத்தில் உருவாகவுள்ள ‘தலைவர் 171’ படத்தின் மிரட்டலான டைட்டில் டீசர் தற்போது ரசிகர்களை பெரிதும் கவர்ந்து வருகிறது. ரஜினி, லோகேஷ் கனகராஜ் இணையும் ‘தலைவர் 171’ படம் மீதுதான் ஒட்டுமொத்த தமிழ் சினிமாவின் பார்வையும் உள்ளது. கோலிவுட் திரையுலகின் சூப்பர் ஸ்டாரும், சென்சேஷனல் இயக்குனரான லோகேஷ் கனகராஜும் இணையும் இப்படம் அனைத்து தரப்பு ரசிகர்களையும் கவரும் என எதிர்பார்க்கப்படுகிறது. இப்படி மிகப்பெரிய எதிர்பார்ப்பை உண்டு பண்ணியுள்ள ‘தலைவர் 171’ படத்தின் மிரட்டலான டைட்டில் டீசர் தற்போது வெளியாகியுள்ளது.
தமிழ் சினிமாவில் தொடர் வெற்றிகளை கொடுத்து தனக்கென ஒரு ரசிகர்கள் பட்டாளம் கொண்ட இயக்குனராக வலம் வருகிறார் லோகேஷ் கனகராஜ். இவரது நடிப்பில் உருவான கமலின் ‘விக்ரம்’ மற்றும் விஜய்யின் ‘லியோ’ படங்களுக்கு பிரத்யேகமாக டைட்டில் டீசர் வெளியிடப்பட்டது. இதில் கமல் பேசும் ‘ஆரம்பிக்கலாமா’, விஜய் பேசும் ‘பிளடி ஸ்வீட்’ வசனங்கள் டிரெண்டிங்கில் கலக்கின.
அந்த வகையில் தற்போது லோகேஷ் கனகராஜ் பாணியில் ‘தலைவர் 171’ படத்திற்காக மிரட்டலான டைட்டில் டீசர் வெளியிடப்பட்டுள்ளது. ஆரம்பத்தில், கொள்ளை கடத்தல் கும்பல் இருக்கும் இடத்திற்கு சோலோவாக என்ட்ரி கொடுக்கும் ரஜினி, ரவுடிகளை அனைவரையும் பொளந்து கட்டி ‘முடிச்சுர்லாமா’ என சிரித்து கொண்டே டையலாக் பேசுவதை போன்று இந்த வீடியோ முடிவடைந்துள்ளது. கமலுக்கு ஆரம்பிக்கலாமா என டையலாக் வைத்த லோகி, தலைவருக்கு ‘முடிச்சுடலாம்’ என டையலாக் வைத்துள்ளார்.
அத்துடன் இப்படத்திற்கு ‘கூலி’ என டைட்டில் வைக்கப்பட்டுள்ளது. இந்த டைட்டில் டீசரில் முழு எனர்ஜியுடன் மரண மாஸ் காட்டியுள்ளார் ரஜினி. சோறுண்டு, சுகமுண்டு, மதுவுண்டு. மாதுவுண்டு. மனமுண்டு என்றாலே சொர்க்கத்தில் இடமுண்டு, போடா என தலைவர் மாஸாக டையலாக் பேசுவதும் டீசரில் ரசிகர்கள் மத்தியில் பெரும் கவனம் ஈர்த்து வருகிறது. மேலும், ஏற்கனவே கூலி என்ற பெயரில் சரத்குமார் நடிப்பில் 1995 ஆம் ஆண்டு வெளியான ஒரு படம் வெளியாகி இருந்தது குறிப்பிடத்தக்கது.
ரஜினி தற்போது ‘வேட்டையன்’ படத்தில் நடித்து முடித்துள்ளார். த.செ. ஞானவேல் இயக்கியுள்ள இப்படத்தில் ஒய்வு பெற்ற போலீஸ் அதிகாரியாக ரஜினி நடித்திருக்கிறார். ‘ஜெய் பீம்’ பட இயக்குனருடன் ரஜினி வேட்டையனில் இணைந்துள்ளதால், இப்படம் சமூகத்தில் பலவித அதிர்வலைகளை ஏற்படுத்தும் என எதிர்பார்க்கப்படுகிறது. ‘வேட்டையன்’ படம் செப்டம்பர் மாதம் திரையரங்குகளில் ரிலீசாகவுள்ளது குறிப்பிடத்தக்கது.
