அம்பாங்:
அடுக்குமாடிக் குடியிருப்பு ஒன்றின் 13-ஆவது மாடியில் இருந்து கீழே விழுந்ததில், 9 வயதுடைய உள்ளூர் சிறுவன் ஒருவன் பரிதாபமாக உயிரிழந்தான். இச்சோகச் சம்பவம் நேற்று இரவு அம்பாங்கில் உள்ள தாமான் கஹாயாவில் (Taman Cahaya) நிகழ்ந்தது.
இதுகுறித்து அம்பாங் ஜெயா மாவட்டக் காவல்துறைத் தலைவர் ஏசிபி கைருல் அனுவார் காலித் கூறுகையில், நேற்று இரவு 7:45 மணியளவில் அடுக்குமாடிக் குடியிருப்பின் தரைத்தளத்தில் சிறுவன் ஒருவன் சுயநினைவின்றி ரத்த வெள்ளத்தில் கிடப்பதைக் கண்ட உள்ளூர் பெண் ஒருவர், உடனடியாகக் காவல்துறைக்குத் தகவல் கொடுத்ததாகத் தெரிவித்தார்.
அதைத் தொடர்ந்து, சம்பவ இடத்திற்கு விரைந்து வந்த அம்பாங் மருத்துவமனையின் உதவி மருத்துவ அதிகாரி, அச்சிறுவன் ஏற்கனவே இறந்துவிட்டதை உறுதிப்படுத்தினார்.
காவல்துறையின் ஆரம்பகட்ட விசாரணையில் அதிர்ச்சிகரமான தகவல் வெளியாகியுள்ளது: இச்சம்பவம் நடந்தபோது அந்த ஒன்பது வயதுச் சிறுவன் வீட்டில் பெரியவர்கள் யாரும் இன்றி தனியாக விடப்பட்டிருந்தது தெரியவந்துள்ளது.
இச்சம்பவம் குறித்துத் தீவிர விசாரணை நடத்தப்பட்டு வருகிறது. இதுவரை சிறுவனின் பெற்றோர், குடும்ப உறுப்பினர்கள் மற்றும் சம்பவத்தைக் நேரில் பார்த்த சாட்சிகள் உட்பட மொத்தம் ஐந்து நபர்களிடமிருந்து போலீசார் வாக்குமூலங்களைப் பதிவு செய்துள்ளனர்.
குழந்தைகளை வீட்டில் தனியாக விட்டுச் செல்ல வேண்டாம் எனப் பெற்றோருக்குக் காவல்துறை மீண்டும் அறிவுறுத்தியுள்ளது. இச்சம்பவம் அப்பகுதி மக்களிடையே பெரும் சோகத்தையும் அதிர்ச்சியையும் ஏற்படுத்தியுள்ளது.
