முன்னாள் பிரதமர் நஜிப் ரசாக், தனது தற்போதைய சிறைத்தண்டனையின் மீதமுள்ள காலத்தை ஆகஸ்ட் 23, 2028 வரை வீட்டுக் காவலில் கழிப்பதற்கான நிபந்தனையுடன் கூடிய மன்னிப்பைப் பெற்றுள்ளார். கூட்டாட்சிப் பிரதேசங்களுக்கான மன்னிப்புக் குழுவின் (FTPB) 64-வது கூட்டத்தில் இந்த முடிவு எடுக்கப்பட்டதாகப் பிரதமர் துறையின் சட்ட விவகாரப் பிரிவு இன்று வெளியிட்ட அறிக்கையில் தெரிவித்துள்ளது.
50 மில்லியன் ரிங்கிட் அபராதத்தைச் செலுத்துவதற்கு உட்பட்டு, மாமன்னர் சுல்தான் இப்ராஹிம் நஜிப்பிற்கு இந்த நிபந்தனையுடன் கூடிய மன்னிப்பை வழங்கியதாக அந்த அறிக்கை கூறியது. பிப்ரவரி 2024-இல் மன்னிப்புக் குழு அவருக்கு வழங்கிய 12 ஆண்டு சிறைத்தண்டனையை பாதியாகக் குறைத்ததைத் தொடர்ந்து, 73 வயதான நஜிப் காஜாங் சிறையில் குறைக்கப்பட்ட ஆறு ஆண்டு சிறைத்தண்டனையை அனுபவித்து வருகிறார். ஆரம்பத்தில் விதிக்கப்பட்ட 210 மில்லியன் ரிங்கிட் அபராதமும் 50 மில்லியன் ரிங்கிட்டாகக் குறைக்கப்பட்டது.
எஸ்ஆர்சி இன்டர்நேஷனல்’ (SRC International Sdn Bhd) தொடர்பான வழக்கில் அவரது இறுதி மேல்முறையீட்டை கூட்டாட்சி நீதிமன்றம் தள்ளுபடி செய்ததைத் தொடர்ந்து, ஆகஸ்ட் 2022-இல் அவர் சிறையில் அடைக்கப்பட்டார். டிசம்பர் 2025-இல், 1MDB தொடர்பான 2 பில்லியன் ரிங்கிட்டிற்கும் அதிகமான பணமோசடி மற்றும் அதிகார துஷ்பிரயோகம் செய்த குற்றத்திற்காக நஜிப் குற்றவாளியாக அறிவிக்கப்பட்டார். அவருக்கு 15 ஆண்டுகள் சிறைத்தண்டனையும் 11.38 பில்லியன் ரிங்கிட் அபராதமும் விதிக்கப்பட்டது. இந்தக் குற்றத்தீர்ப்பை எதிர்த்து அவர் மேல்முறையீடு செய்து வருகிறார்.
